Сиљановска-Давкова по повод празникот: Кирил и Методиј се темел на духовниот и културниот идентитет на македонскиот народ

Претседателката Гордана Сиљановска-Давкова по повод 24 Мај – Денот на светите браќа Кирил и Методиј, порача дека нивното дело претставува темел на духовниот и културниот идентитет на словенските народи, меѓу кои и на македонскиот народ.

„Малкумина луѓе во историјата имале чест да бидат перцепирани од многу народи и држави како апостоли и заштитници на Европа. Такви се солунските браќа“, порача претседателката Сиљановска – Давкова во својата честитка за денот на сесловенските просветители.

Шефицата на државата истакна и дека Кирил и Методиј се творци на глаголицата, просветители и описменувачи на словенските народи, додавајќи дека нивното дело и денес има силна обединувачка моќ и претставува заедничко цивилизациско наследство. „Кирил и Методиј го изградија и се вградија во темелот на духовниот и културниот идентитет на словенските народи, меѓу кои и на македонскиот“, наведува Сиљановска-Давкова.

Во нејзината објава стои и дека јазикот не е само средство за комуникација, туку и носител на колективната меморија, вредностите и чувството на припадност на еден народ. „Јазикот не е само збир на зборови, туку и колективна меморија, вредносен код и чувство на припадност што еден народ ги пренесува низ времето“, истакна претседателката.

Во празничната порака, Сиљановска-Давкова оцени дека денешното време на поделби и отуѓеност е потсетник дека без култура, образование, наука и вредносен систем не може да се изгради доверба и заедништво во едно општество.

„Светите Кирил и Методиј ја отворија можноста словенскиот човек својата мисла, вера и културна самосвест да ги артикулира на јазикот што го разбира и чувствува како свој“, порача таа, дополнувајќи дека во време на неизвесност, длабоки поделби и сè поизразена отуѓеност, 24 Мај нè потсетува дека без култура, образование и наука, но и без вредносен систем , ниту едно општество не може да изгради меѓусебна доверба и заедништво.