Шведски тинејџер (18), познат под прекарот „Чаи“ (Chai), е осуден на повеќе од десет години затвор за обид за убиство, силување и тежок напад поттикнати преку интернет. Неговите жртви, меѓу кои имало и малолетник, се наоѓале во Германија и Австралија, пренесува „Гардијан“.
Окружниот суд утврди дека Чаи дејствувал во рамките на онлајн мрежи специјализирани за садистичка изнуда на млади и ранливи лица. Членовите на таквите групи ги принудувале жртвите да создаваат сексуално експлицитни содржини или да вршат акти на насилство; карактеристика на овие мрежи е тоа што самите сторители се многу млади.
Во времето кога биле извршени кривичните дела, Чаи имал меѓу 15 и 17 години. Тој беше прогласен за виновен за две точки од обвинението за обид за убиство врз млада личност во Германија и за низа сексуални и насилни дела врз австралиски тинејџер.
Вишиот јавен обвинител Џени Остлинг, од шведската единица за борба против меѓународниот и организираниот криминал, изјави дека со оваа пресуда судот јасно го препознал феноменот на таканаречениот „нихилистички насилен екстремизам“. Ова го вклучува „Ком“ (Com) – заеднички назив за лабаво поврзана онлајн мрежа вклучена во сајбер-криминал, изнуда и насилство.
„Мило ми е што судот ја разбра сериозноста на ситуацијата и за што точно станува збор“, рече Остлинг. Таа истакна дека изречената казна е една од најдолгите можни во Шведска за лице на возраста на Чаи. Судот исто така потврди дека е можно да се осуди сторител на насилни кривични дела дури и ако тие биле извршени од далечина, преку интернет. „Тоа е исклучително важна алатка за нас при постапувањето во вакви случаи“, додаде Остлинг.
Кривичните дела извршени од членови на садистички мрежи за изнуда, како што е онаа позната како „764“, честопати ги преминуваат националните граници. Пријавени се случаи во САД, Обединетото Кралство, Германија и Австралија, а жртвите се наоѓаат во бројни јурисдикции.
Адвокатите и истражителите објаснија за „Гардијан“ дека учесниците во овие мрежи создаваат и разменуваат материјали за да стекнат статус и контрола. Таквата содржина служи и како влезница за пристап до затворени сервери и соби за разговор (чет-соби). „Овде, младите регрутираат други млади луѓе“, изјави претходно Бјорн Ихлер, основач на безбедносната компанија „Ревонтулет“ (Revontulet). „Тоа е феномен својствен за младите.“
Пресудата против Чаи е една од низата пресуди што резултираа со тешки затворски казни за млади мажи вклучени во овој екосистем. Во август, Американецот Кајл Спице (27) беше осуден на 77 години затвор – најдолгата федерална казна изречена на лице означено од американската влада како „нихилистички насилен екстремист“.
За време на судењето, Чаи беше подложен на психијатриско вештачење, со кое беше утврдено дека тој не боледувал од сериозно ментално растројство во моментот на извршување на кривичното дело. Неговата адвокатка, Емили Товедал, изјави за „Гардијан“: „Ставот на одбраната е дека судот погрешно ги оценил голем дел од обвиненијата.“
