Швајцарија утре ќе гласа за ограничувањето на бројот на жители – исходот клучен за односите со ЕУ

Швајцарските граѓани ќе гласаат во недела, 14 јуни, на референдум за иницијатива со која ќе се ограничи населението на земјата на 10 милиони, што, според аналитичарите, може да има значителни последици за односите со Европската Унија.

Предлогот, исто така, бара од владата да реагира ако населението достигне 9,5 милиони, што, според „Еурактив“, директно би влијаело на имиграциската политика и слободното движење на луѓето.

Европската комисија соопшти дека внимателно го следи гласањето, нагласувајќи дека слободното движење на луѓето е „клучен елемент“ на односите меѓу ЕУ и Швајцарија.

Швајцарија, иако не е членка на ЕУ, има блиски економски и правни врски со блокот, вклучувајќи пристап до Шенген зоната и договори што овозможуваат слободно движење на работници.

Експертите предупредуваат дека усвојувањето на иницијативата може да доведе до прекинување или сериозно нарушување на постојните договори со ЕУ, што потенцијално би го ограничило пристапот на швајцарските компании до европскиот пазар и би имало последици за швајцарските граѓани што живеат во земјите-членки на ЕУ.

Претставниците на швајцарската бизнис заедница изразија загриженост, наведувајќи дека ограничувањата за имиграција би можеле негативно да влијаат на пазарот на трудот и достапноста на квалификувана работна сила.

Швајцарската влада и сите поголеми партии, како и синдикатите, се против иницијативата, која тврди дека ќе ги лиши болниците и хотелите од многу потребен персонал и ќе го оштети тешко стекнатиот однос со ЕУ, но исто така ќе ја остави Швајцарија, која не е членка на Унијата, изолирана во многу опасен свет, пишува „Би-би-си“.

Од друга страна, поддржувачите на иницијативата, од редовите на десничарската Швајцарска народна партија, тврдат дека растот на населението е превисок и ја оптоварува инфраструктурата, пазарот на недвижности и животната средина, и дека се потребни построги контроли на миграцијата.

Според најновите анкети, мало мнозинство граѓани во моментов се против предлогот, иако јазот меѓу поддржувачите и противниците е мал, додека дел од гласачите остануваат неодлучни.

Исходот од гласањето би можел да има долгорочни импликации за односите Швајцарија-ЕУ, вклучително и идните преговори за постојните и новите билатерални договори.

Населението на Швајцарија брзо порасна, од 7,3 милиони во 2002 година на 9,1 милиони денес, од кои 27 проценти се странски државјани.

Повеќето гласачи се загрижени за преполните возови, скапите станови и растечките трошоци за здравствена заштита.