Лидерот на опозицијата, Александар Вучиќ, ги отфрли обвинувањата за неговото однесување во изборната ноќ и најави дека во Народното собрание ќе изнесе детали за настаните што се случиле по затворањето на гласачките места.
Вучиќ, ѝ се обрати на јавноста преку видеопорака на Инстаграм, во која остро ги негираше тврдењата за настаните во изборната ноќ. Тој најави дека утре во Народното собрание на Србија ќе зборува за тоа што се случило откако се затвориле гласачките места.
Вучиќ изјави дека информациите што кружат во јавноста се невистинити, притоа конкретно отфрлајќи ги наводите дека планирал да предизвика конфликт во изборната ноќ, но дека наводно бил спречен во тоа.
„Слушнав толку многу лаги за изборната ноќ. За сите детали ќе зборувам во Народното собрание. Но, бидете сигурни, луѓе – сè што кажаа е дрска лага“, изјави Вучиќ.
View this post on Instagram
Осврнувајќи се на контактите што ги имал на денот на изборите, лидерот на опозицијата тврди дека по 20:00 часот не добил ниту еден телефонски повик, а дека претходно во текот на денот, единствените разговори што ги водел се однесувале на еден инцидент во Лазаревац.
Според него, никој не му упатил никакви предупредувања, ниту пак некој се обидел да влијае врз неговите одлуки во изборната ноќ.
„До студентите што учествуваат во блокадите: престанете да лажете, или кажете ми точно кој наводно ме предупредил за нешто. Што е, ви фали јазик?…“ – прокоментира Вучиќ. Тој упати остри критики кон Радио-телевизија Србија (РТС), обвинувајќи го јавниот сервис дека шири невистини за неговата улога во настаните што следеа по изборите.
Вучиќ ги отфрли тврдењата дека имал намера да предизвика инциденти, нагласувајќи дека пред јавноста ќе ја изнесе својата верзија за настаните.
Вучиќ истакна дека одлуката да ги прифати изборните резултати ја донел самостојно, како и дека за тоа ги известил претставниците на војската и полицијата. Според него, дури 12 команданти биле запознаени со неговата одлука, поради што тој смета дека обвинувањата против него се неосновани.
Лидерот на опозицијата најави дека, за време на своето обраќање во парламентот утре, ќе зборува и за тоа кој – според неговите тврдења – се обидел да предизвика конфликт во Србија.
„И утре, следете го Народното собрание, ќе биде интересно да се слушне вистинската вистина – кој што направил, кој сакал да предизвика граѓанска војна и како јас спречив конфликти и граѓанска војна, зачувувајќи ја на тој начин стабилноста на Србија“, изјави Вучиќ.
На крајот од своето обраќање, тој ги обвини своите политички противници дека се обидуваат да го прикријат отсуството на политичка програма преку ширење невистини.
„Да живее Србија – вистината секогаш победува“, заклучи Вучиќ.












