Што е „парацетамол предизвик“?: Нов тренд се шири на социјалните мрежи – предупредуваање за ризиците

Здравствените експерти предупредуваат за „парацетамол предизвикот“, тренд на социјалните медиуми што може да го загрози здравјето на луѓето. Но, што точно е тоа и дали навистина постои?

Здравствените власти низ цела Европа го кренаа алармот поради извештаите дека тинејџерите наводно се натпреваруваат преку интернет за да видат кој може да внесе најмногу парацетамол, пренесува Euronews.

Референците за предизвикот датираат од 2015 година. Сепак, пребарувањето на терминот „парацетамол предизвик“ на TikTok покажува малку докази за луѓе кои всушност учествуваат во трендот. Поголемиот дел од содржината на оваа тема доаѓа од здравствени експерти или новински профили кои предупредуваат на опасностите.

Сепак, во Белгија, болничкиот центар EpiCURA потврди за Euronews Health дека лекувал тројца пациенти од предозирање со парацетамол во февруари откако учествувале во предизвикот на социјалните медиуми.

Белгиската федерална агенција за лекови и здравствени производи издаде предупредување на 6 февруари за ризикот од предозирање. Агенцијата соопшти дека земањето парацетамол, дури и во високи дози, нема психоактивен ефект.

Други земји, исто така, пријавија тренд во случаи на предозирање.

„Разговарајте со вашите деца, водете ги во користењето на технологијата и бидете внимателни на предупредувачки знаци како што се повраќање, болки во стомакот или прекумерна поспаност“, рече Слива Олива, педијатриска медицинска сестра во Регионалната универзитетска болница во Малага, Шпанија, во објава на социјалните мрежи од болницата.

Пиа Вуорела, директорка на Финската агенција за лекови, исто така истакна дека е важно младите да ги разберат ризиците поврзани со лековите и ги повика родителите да разговараат со децата за овие опасности.

Во Португалија, Комората на фармацевти предупреди дека ваквите практики претставуваат сериозен ризик по здравјето, нагласувајќи дека токсичноста од парацетамол може да се појави уште пред да се развијат видливи симптоми.

„Предозирањето може да предизвика сериозно и неповратно оштетување на црниот дроб, што може да доведе до акутно откажување на црниот дроб, потреба од трансплантација, а во екстремни случаи и до смрт“, се наведува во соопштението.

Во поретки случаи може да се појави и оштетување на бубрезите, особено при долготрајна употреба или прекумерен внес на лекот.

Препорачана дневна доза

Кај возрасни лица дневната доза на парацетамол не треба да надминува 4 грама, а вообичаено се земаат 500 милиграми до 1 грам на секои 4 до 6 часа.

Кај децата дозата се пресметува според телесната тежина, а како општо правило се препорачуваат 60 милиграми по килограм телесна тежина. Родителите можат да користат проверени онлајн калкулатори за попрецизно одредување на дозата.

Првите симптоми на труење најчесто вклучуваат гадење, повраќање, потење и општа слабост, кои обично се појавуваат во првите 24 часа. Може да се јави и болка во стомакот, а како што напредува оштетувањето на црниот дроб, може да се развијат и сериозни компликации.

Во случај на сомнеж за предозирање, лекарите предупредуваат дека неопходно е веднаш да се побара медицинска помош.

Парацетамолот е еден од најчесто користените лекови за намалување на болка и температура, а кога се употребува според препораките на здравствените власти, вообичаено се смета за безбеден.