EPA/TOLGA AKMEN

Најдобриот тенисер на сите времиња, Србинот Новак Ѓоковиќ, ја прифати поканата да учествува на спектакуларниот егзибициски турнир „Шест кралеви слем“, во Ријад, каде што го чекаат најголемите ѕвезди на овој спорт, како и борбата за исклучително богата парична награда.

Натпреварувањето во Саудиска Арабија ќе се одржи на 27, 28 и 30 декември, во АНБ-арената, а организаторите собраа шест врвни играчи. Покрај Ѓоковиќ, на турнирот ќе настапат Карлос Алкарас, Александар Зверев, Тејлор Фриц, Алекс де Минор и Американецот Лернер Тиен, кој првично го зазеде местото на повредениот Јаник Синер.

Сепак, најголемо внимание привлекува Новак, кој ќе има посебна привилегија – директен пласман во полуфиналето. Причината е едноставна: Ѓоковиќ и Алкарас имаат освоено најмногу титули на гренд слем турнирите меѓу учесниците, па затоа не мора да играат во четвртфиналето.

Милиони на маса, а Новак има посебен мотив

„Шест кралеви слем“ веќе стекна репутација како еден од најпрофитабилните егзибициски турнири во тенисот. Колку се сериозни парите во Ријад покажуваат податоците од претходните две изданија: секој учесник добил 1,5 милиони долари само за настап, додека вкупната заработка на шампионот достигнала дури шест милиони долари, вклучувајќи го и гарантираниот хонорар.

Ова е сумата што го издвојува овој турнир од речиси сите други тениски натпреварувања. Сепак, важно е да се нагласи дека организаторите за изданието во 2026 година сè уште официјално не потврдиле дека наградниот фонд ќе биде идентичен со претходните години.

Освен финансискиот мотив, Ѓоковиќ ќе има дополнителна причина да го даде својот максимум. Тој сè уште не го освоил трофејот во Ријад, а во претходните две изданија имаше различни резултати. Во 2024 година го победи Рафаел Надал во натпреварот за третото место, додека во 2025 година го заврши натпреварувањето со пораз од Тејлор Фриц во борбата за истата позиција.

 

ИЗДВОЕНИ