Се запали дива депонија во Шуто Оризари, активни пет пожари во државава 

Утринава, повторно се разгоре пожарот што избувна синоќа помеѓу гробиштата Бутел и Шуто Оризари.

Од Центарот за управување со кризи информираат дека преку бројот 112 била добиена пријава за пожар на сува трева и ѓубре и оти тој се проширува кон куќите, кај „Џиди Комерц“, во Шуто Оризари. Воедно, известена е и Бригадата за  противпожарна заштита на Град Скопје.

Од Министерството за внатрешни работи потврдија дека пријавата за пожарот била примена во 7 часот.

– Во 07:00 часот, во Секторот за внатрешни работи – Скопје е пријавено дека во населбата Шуто Оризари гори дива депонија. Бригадата за противпожарна заштита презема мерки за гасење на пожарот“ – соопштија од МВР.

Засега нема информации за евентуално повредени лица или за причините за избувнувањето на пожарот.

Од ЦУК  соопштија дека денеска до 12:00 часот на територијата на државата биле регистрирани седум пожари на отворен простор, од кои пет се активни, а два се изгаснати.

Активни се пожарите во: општина Шуто Оризари – кај „Џиди Комерц“,општина Старо Нагоричане – во село Ругинце, каде се зафатени ниска вегетација, стрниште и сува трева, општина Дојран – во селото Сретеново, каде гори шума, општина Велес – покрај автопатот Велес, општина Штип – кај Чолошево, каде гори ниска вегетација и сува трева и општина Велес – на градската депонија, каде гори ѓубре.

Изгаснати се пожарите во село Житоше – општина Долнени, во близина на училиштето, каде гореле ниска вегетација и сува трева и  во селото Кукуречани- општина Битола, каде горело ѓубре.

(А.П.) Фото: (Ѕ.П.)