Се бара итно прогласување на заштитено подрачје за Кожув

Кожув се издвојува како едно од најзначајните природни планински подрачја во државата поради својот исклучително богат биодиверзитет, разновидните геолошки и хидролошки појави и присуството на ретки и ендемични видови.

Токму поради ова, експерти, институции и претставници на локалната заедница бараат негово итно прогласување и управување како заштитено подрачје.

Во Народниот театар во Гевгелија неодамна се одржа форумот „Дијалог за иднината на Кожув“, организиран од Центарот за климатски промени и Фондацијата за локален и ИТ-развој од Гевгелија. На форумот беа презентирани научни и стручни анализи за природните вредности на планината и потребата од долгорочна заштита.

Кожув се одликува со разновиден релјеф, карстни и глацијални форми, палеовулкански структури, бројни извори и водотеци, како и развиени шумски и планински екосистеми. Овие природни карактеристики ја прават планината еден од највредните природни комплекси во регионот.

Особено значење има биолошката разновидност, при што се регистрирани ендемични и ретки видови како алшарската темјанушка (Viola allchariensis), арсеновата темјанушка (Viola arsenica), алшарската матерка (Thymus alsarensis) и кавадаречкиот различник (Centaurea kavadarensis), кои имаат висока научна и заштитна вредност.

Дополнително, Кожув е веќе дел од Емералд-мрежата според Бернската конвенција и е идентификуван како значајно подрачје за птици, растенија и пеперутки, што претставува меѓународно признание за неговата еколошка важност.

На форумот беше нагласено дека заштитата на Кожув не се однесува само на зачувување на природата туку и на создавање услови за одржливо управување со ресурсите, зајакнување на отпорноста на климатските промени и развој на локалните заедници преку одржливи модели.

Како заклучок беше истакнато дека Кожув бара итна, системска и долгорочна заштита, а во следниот период се предлагаат теренски истражувања и детална анализа на биолошката и пределската разновидност, како и социо-економските аспекти, со цел утврдување на соодветен степен на заштита и модел на управување.