Министерството за одбрана на САД објави нов пакет декласифицирани материјали поврзани со неидентификуваните аномални појави (UAP), во јавноста попознати како НЛО. Станува збор за шестата серија материјали објавени преку Канцеларијата за решавање аномалии во сите домени (AARO), која при Пентагон собира и анализира извештаи за необјаснети појави.
Новата серија содржи вкупно 71 датотека, од кои 67 се од Министерството за одбрана, а четири се од локалната полиција во Колорадо. Материјалите опфаќаат 55 PDF-документи, 15 видеа и една аудиоснимка, а повеќето од документите – 64 – се делумно цензурирани. Датотеките се однесуваат на периодот од 1952 до 2025 година.
Меѓу новообјавените материјали има и снимки од објекти забележани на Блискиот Исток.
На едно од видеата, снимено во 2024 година со инфрацрвен сензор, се гледа светла точка која брзо се движи низ видното поле на камерата. Во придружниот опис, објектот е наведен како „бела тркалезна сфера“, со проценета брзина од околу 500 милји на час, односно приближно 804 километри на час.
Друго видео, снимено во 2025 година, прикажува шест слични објекти над копнени структури. Според описот на случајот, тие се движеле во формација околу една минута, при што често ја менувале насоката. Нивната брзина била проценета на околу 480 милји на час, односно приближно 770 километри на час.
AARO нагласува дека фактот што објектите се водат како неидентификувани не значи дека се утврдила нивната вонземска природа.
Во дел од случаите достапните податоци не се доволни за сигурна идентификација, додека други случаи со текот на истрагата биле објаснети како познати објекти или природни појави.
Посебно внимание привлекуваат документите поврзани со AAWSAP – Advanced Aerospace Weapon System Applications Program, програма на американската Агенција за одбранбено разузнавање (DIA).
Програмата била започната во 2008 година со цел да се истражат потенцијални идни воздухопловни закани и напредни технологии, а била прекината во 2012 година, пренесе „Си-би-ес њуз“.
Меѓу декласифицираните материјали има документи во кои се разгледуваат концепти како „warp“ погон, црвоточини, антигравитација, негативна маса и други теоретски напредни технологии.
Во еден од документите се наведува дека целта била да се разберат физиката и инженерството на потенцијалните напредни системи во контекст на долгорочни надворешни закани, со временски хоризонт до 2050 година. Фокусот бил ставен на технологии и примени кои би можеле значително да отстапуваат од постоечките технолошки трендови.
Важно е, сепак, што самото проучување на овие концепти не претставува доказ дека таквите технологии се развиени, оперативни или дека американската војска располага со нив. Станува збор за истражувачки материјали создадени во рамките на програмата.
Материјалите се објавени од Канцеларијата за решавање аномалии во сите домени (AARO) при Пентагон, која собира и анализира извештаи за неидентификувани аномални појави. Официјалната база на податоци на AARO содржи видеа снимени со различни сензори на воени платформи на САД.
