Рускиот гас се враќа во Европа?

Високи претставници од САД и Русија разговараат за можноста за вклучување на американски инвеститор во компанијата што управува со „Северен тек“ – која претходно беше главната рута за снабдување на Германија и Европа со руски гас. Во овие разговори учествуваат американскиот специјален пратеник Џаред Кушнер и Кирил Дмитриев, близок советник на рускиот претседател Владимир Путин, според пет анонимни извори запознаени со случајот кои разговарале со Ројтерс.

Двајцата се сретнале во Москва и Њујорк во текот на изминатите недели, а темата за „Северен тек“ била дел од нивната агенда.
Кушнер, кој се обидува да посредува за ставање крај на војната во Украина, смета дека деловните аранжмани би можеле да бидат дел од поширок процес за воспоставување мир.

Според ова сценарио, американските инвеститори би можеле да учествуваат во идните енергетски текови кон Европа и да остваруваат профит откако ќе заврши војната.

Разговорите меѓу Вашингтон и Москва не се ограничени само на гасот.

Кушнер и Дмитриев разговараат и за потенцијалната продажба на европски и други средства во сопственост на рускиот енергетски гигант „Лукоил“, вклучувајќи рафинерии и бензински пумпи.

Според еден од моделите што се разгледуваат, конзорциум составен од американската агенција DFC и инвеститори од Катар и Обединетите Арапски Емирати би ги презеле овие средства, додека американските власти би ги укинале санкциите.

„Стив (Виткоф) и Џаред (Кушнер) работеа со DFC на преговорите во врска со значителна авансна исплата и удел во идниот профит за САД“, изјави претставник на Белата куќа.

Сепак, еден американски претставник изјави дека, поради бројни пречки, малку е веројатно да се постигне договор за обновување на испораките на руски гас на среден рок.

Гасоводите „Северен тек“ моментално се предмет на американски и европски санкции, па нивното повторно пуштање во употреба под сегашните околности би било незаконско.

Вашингтон би можел да ги ублажи или укине американските санкции, но евентуалната победа на Демократите на изборите за Конгресот следниот месец би го отежнала таков потег.

Пред почетокот на војната во Украина во февруари 2022 година, Германија ги задоволуваше повеќе од половината од своите потреби за гас преку увоз од Русија, користејќи ги двата гасовода „Северен тек“. Испораките подоцна беа намалени, а цевководите беа оштетени во серија подводни експлозии во септември 2022 година.

Секое евентуално враќање на рускиот гас би наишло и на силен политички отпор во другите европски земји – особено во Полска и балтичките држави – кои го сметаат тоа за безбедносен ризик.