Град Скопје ги доби специјализираните возила за одржување на хигиената

Град Скопје, конечно, ги доби специјализираните возила за ЈП „Комунална хигиена“. Градоначалникот на Град Скопје, Орце Ѓорѓиевски, истакна дека тие веќе му се предадени на Градот и оти во наредните денови, по завршувањето на правните процедури, ќе излезат на терен.

– До крајот на неделава, пристигнува и првата испорака од вкупно 3.300 нови контејнери – најголемата набавка досега. Чистиот град значи здравје, достоинство и подобар живот за сите. Затоа секој од нас има одговорност да го чува. Нашата работа нека биде поттик за поголема грижа, а секоја чиста улица – обврска таква и да остане – изјави Ѓорѓиевски.

Тој нагласи дека Скопје предолго губело поради неодговорноста и неажурноста на претходниците и како што нагласи, со работа и со конкретни дела ѝ се става крај на таа запуштеност.

– Со силна волја, макотрпна работа и со заедничка одговорност, Скопје повторно ќе биде горд град – заклучи скопскиот градоначалник.

На презентацијата на комуналните возила, меѓу кои 19 мултифункционални камиони, девет цистерни за миење улици, како и 21 мултифункционално возило, која беше на 3 септември, Ѓорѓиевски истакна дека од вкупно 49, Скопје ќе добие повеќе од 27 возила, а другите возила ќе им бидат распределени на градовите: Куманово, Прилеп, Струмица, Штип, Охрид, Тетово, Неготино, Кичево, Дебар и Велес.