Руситe се плашат од нова масовна мобилизација што би можела да следува по изборите што почнаа вчера, а на кои прилично извесна е победата на партијата на претседателот Владимир Путин. Во последните месеци, Кремљ негираше дека се подготвува нова мобилизација, но неколку европски безбедносни служби веруваат дека Путин има намера да испрати уште 300.000 луѓе во војна до крајот на годината. Како што пишува „Блумберг“, стравот од нови регрутации се проширил во Кремљ, па дури и меѓу вработените во воените канцеларии за регрутирање.
Како доказ се наведува тоа што во последните месеци има масовно отворање банкарски сметки во странство и префрлање средства надвор од Русија. Според документите до кои имал пристап медиумот, високи функционери на Кремљ ги охрабруваат пријателите и роднините да ја напуштат земјата што е можно поскоро, иако руските власти сакаат да ги избегнат сцените на масовно бегство од земјата во 2022 година, кога беше објавена првата мобилизација. Како резултат на тоа, тајно беше изградена дигитална платформа за служење воени регрути, додека потенцијалните патишта за напуштање на земјата беа затворени.
Но, сега веќе нема хартиена, туку електронска регрутација. Новиот Унифициран регистар на регрути автоматски се поврзува со даночните власти, полициските бази на податоци, медицинските картони, имотните регистри и со граничната контрола. Според новите прописи, електронската регрутација се смета за доставена седум дена по нејзиното објавување на државниот портал, без оглед на тоа дали примателот ја видел. Во моментот кога е испратена регрутацијата, автоматски се активира забрана за напуштање на земјата за тоа лице на граничните премини. Ова ги спречува регрутите да ја напуштат Русија.
Дополнителни санкции може да се изречат за оние што нема да се пријават во центарот за регрутирање во рок од 20 дена. Тие вклучуваат ограничувања за пристап до јавни услуги, како што се регистрација на возила, продажба на недвижен имот или добивање кредит.
