По повеќемесечна истрага, под раководство на Основното јавно обвинителство за гонење организиран криминал и корупција, полицијата разби организирана криминална група која стои зад нелегален увоз, дистрибуција и апликација на медицински препарати, меѓу кои и ботокс.
Во координирана акција спроведена од Одделот за сузбивање на организиран и сериозен криминал, извршени се претреси на повеќе локации во Скопје, Струмица и Битола, врз основа на судски наредби. Приведени се 14 лица, меѓу кои лекари од јавното здравство, сопственици на приватни дерматолошки ординации, како и лица кои биле вклучени во транспортот и дистрибуцијата на нелегално внесени лекови и медицински помагала.
Обвинителството отвори истрага против вкупно 19 физички и шест правни лица, поради сомнежи за злосторничко здружување, повреда на права од индустриска сопственост и неовластена употреба на туѓа фирма, како и за примање поткуп.
Според истрагата, во текот на 2026 година, седуммина осомничени формирале две одделни криминални групи, кои подоцна се прошириле. Тие користеле фирми од Скопје и Битола како параван, преку кои организирано набавувале фалсификувани медицински препарати од Србија, Кореја и Турција. Препаратите потоа нелегално се внесувале во земјава, се складирале и се пласирале на пазарот, а дел од нив биле и директно аплицирани врз пациенти.
Обвинителството наведува дека дел од осомничените биле свесни дека станува збор за производи без одобрение од Агенцијата за лекови МАЛМЕД, без декларации и упатства за употреба, но сепак ги користеле при естетски интервенции, со што сериозно го загрозиле здравјето на граѓаните.
Во истрагата е опфатен и царински службеник, кој, според сомневањата, примил поткуп за да овозможи нелегален влез на стока без царинска контрола.
Дополнително, меѓу осомничените има и блиски роднини на дел од инволвираните, кои учествувале во складирање и чување на нелегалните препарати, иако биле запознаени со нивното потекло.
Поради тежината на делата и опасноста од бегство или влијание врз истрагата, обвинителството предложи мерка притвор за 12 осомничени, додека за останатите се бараат полесни мерки за обезбедување на нивното присуство.
ИЗДВОЕНИ
САМИТОТ НА ПСЈИЕ ВО СОФИЈА- Сиљановска-Давкова: Балканот има потреба од дебалканизација преку европеизација
ЗАВРШИ УШТЕ ЕДНА УЧЕБНА ГОДИНA, НО ГРИЖИТЕ ОСТАНУВААТ: Одѕвони и последното ѕвонче за годинава, ќе има ли повеќе ученици во клупите во септември?
Македонските конфекции добиваат 5 евра за кошула „хуго бос“, европските продавници ја продаваат за 40 евра
Го уништивме „Езеро Треска“, а за’рѓаа и реквизитите во аквапаркот
