Претседателот Навроцки го обвини премиерот Туск за хаосот во Уставниот суд во Полска

На денешната седница на Советот за национална безбедност, полскиот претседател Карол Навроцки го обвини полскиот премиер Доналд Туск дека предизвикал хаос во Уставниот суд, кој започна на 30 октомври, опишувајќи го обидот за насилно преземање на контролата врз судот како „повеќе од злосторство“.

Карол Навроцки изјави дека постапките на владата, предводена од Доналд Туск, довеле до „околности без преседан и ситуација на сериозна уставна криза“.

„Преку политичка одлука, владата се обиде незаконски да го преземе Уставниот суд. Тие се обидеја да го сторат тоа искористувајќи го моето отсуство од Полска. (…) Владата ја избра ноќта пред еден важен ден за полскиот народ – Денот на сите светии – за да постави поединци во Уставниот суд кои себеси се сметаат за судии, иако, според законот, тие не се тоа“, рече тој, како што пренесува „Полсат њуз“ (Polsat News).

Тој продолжи:

„Овие поединци си доделуваат овластувања да ги суспендираат судиите, постапувајќи без никаква правна основа. Ова го потврдија првиот претседател на Врховниот суд, претседателот на Врховниот управен суд и претседателот на Врховниот адвокатски совет“, истакна полскиот претседател.

Тој понатаму тврдеше дека премиерот е единствено одговорен за настаните што се случија пред Уставниот суд. „Г-дин премиер, во Вашиот случај – според мене – ова не е само злосторство против Уставот на Република Полска; тоа е нешто повеќе. Тоа е грешка. Вие, г-дин премиер, веќе знаете дека сте направиле грешка, а и двајцата знаеме дека Вашите поранешни сојузници веќе не се на Ваша страна, оставајќи Ви ја на располагање само силата – што е подеднакво загрижувачки“, рече тој, обраќајќи му се директно на Туск.

Тој го обвини за „уништување на угледот на Полска“ и „плашење на инвеститорите“, додека „луѓето немаат пристап до медицинска нега, цените на горивото се неразумни, а државниот долг достигнува рекордни нивоа“. Навроцки изјави дека во Полска важи еден основен принцип: ниедна власт не може да биде апсолутна. Тој го повика Туск „да ги заузда своите стремежи кон власт“.

„Владеењето на правото не може да се воспостави преку методи кои самите грубо го прекршуваат законот“, изјави претседателот.

Најновата фаза од конфликтот околу Уставниот трибунал се одвива од петокот вечерта.

Тогаш, претставници на група – избрана од актуелниот парламентарен состав за судии на Уставниот трибунал – објавија дека Ана Корвин-Пјотровска, како судија со најдолг стаж, го презела раководењето со Трибуналот. Таа донесе одлука за суспендирање на претседателот на Уставниот трибунал, Богдан Швјенчковски, и на потпретседателот, Бартломеј Сочански, од нивните должности.

Полициски службеници пристигнаа во просториите на Уставниот трибунал, што предизвика револт кај демонстрантите собрани на авенијата „Шуха“ во Варшава. На протестот присуствуваа претставници на опозициските партии, како и претседателот Карол Навроцки, кој се врати од патување за време на кое требаше да го посети Сенегал.

Според Навроцки, „дојде до кршење на уставниот поредок на Република Полска и до насилно преземање на еден уставен државен орган“.

Во обраќањето до нацијата во саботата вечерта, полскиот премиер Доналд Туск, меѓу другото, изјави дека актуелниот Сејм „избрал нови судии, кои положиле заклетва“.

Тој додаде дека претседателот Навроцки не ја примил нивната заклетва, дека претседателот на Уставниот трибунал, Швјенчковски, ги спречил да започнат со работа, и дека „кога, по повеќенеделно трпеливо чекање, одлучиле да ги преземат своите должности (…), биле нападнати“.

Понатаму наведе дека полицијата „го заштитила Уставниот трибунал од напаѓачите“.

Во меѓувреме, во вторникот, во Уставниот трибунал започна седница со учество на осум судии, на која се разгледуваше предлог-буџетот на оваа институција, пренесе „Бета“.