Поради загриженост за безбедноста на железницата: Железничарите во Шпанија најавуваат штрајк

Комитетите на вработените во шпанските железнички компании „Адиф“ (Adif) и „Ренфе“ (Renfe) се договорија да одржат штрајк на 17 ноември, наведувајќи ја како причина загриженоста за безбедноста на железницата. Во меѓувреме, шпанската влада најави издвојување 30 милиони евра помош за семејствата на жртвите и за повредените во железничката несреќа во која животот го загубија 69 лица.

Штрајкот е организиран од комитетот на вработените во „Адиф“ – кој ги вклучува синдикатите CC OO, UGT, CGT, Железничкиот синдикат и Синдикатот за железнички транспорт – а предлогот е проширен и до комитетот на вработените во „Ренфе“.

Според шпанскиот весник „Ел Паис“ (*El País*), штрајкот сè уште не е официјално прогласен.

Во меѓувреме, „Адиф“ ги преиспитува оперативните процедури во своите контролни центри во врска со дефектите на системот LZB – безбедносен систем што се користи на линијата Мадрид–Севиља. Истрагата има за цел да утврди дали издавањето упатства што се во спротивност со утврдените прописи – како оние што ги добил машиновозачот вклучен во несреќата кај Урда, во провинцијата Толедо – претставувало вообичаена практика.

Шпанскиот министер за транспорт, Оскар Пуенте, најави дека владата ќе издвои 30 милиони евра за помош на погодените од несреќата, во која животот го загубија 69 луѓе. Тој исто така најави намалување на зачестеноста на возовите на линијата Мадрид–Севиља сè додека не се воведе нов безбедносен систем, и изјави дека, во иднина, секое упатство дадено на машиновозачите ќе биде проверувано од дополнителен контролор.

Мрежата на брзи железници – која некогаш беше симбол на национална гордост за Шпанија – забележа 115 смртни случаи во две железнички несреќи во текот на девет месеци, наведува „Рапортер“ (*Raporter*).

Во претходната несреќа, што се случи во градот Адамуз во провинцијата Кордоба, животот го загубија 46 лица – исто така на железничката линија Севиља–Мадрид.