Италијанската полиција соопшти дека запленила фотографија и пригушувач за време на претресот во покраината Александрија, за кои верува дека би можеле да бидат важен доказ во истрагата за „викенд снајперистите“ кои пукале во цивили на улиците на опколено Сараево од планините за време на војната во Босна и Херцеговина во 1990-тите.
Претресот е извршен утрово на барање на обвинителството во Милано, кое истражува четворица осомничени за убиства извршени помеѓу 1992 и 1995 година за време на опсадата на Сараево, објави италијанската новинска агенција Анса. Според полицијата, запленетата фотографија го прикажува еден од осомничените во униформа на засега непозната локација, за која се верува дека е во Босна и Херцеговина.
Во операцијата е пронајден и пригушувач.
Меѓу осомничените има мажи на возраст меѓу 64 и 80 години од различни делови на Италија.
Тројца од нив веќе биле испрашувани во претходните месеци и ги негирале обвиненијата.
Истражителите беа особено заинтересирани за сведочењето на поранешната партнерка на еден од осомничените, кој изјави дека ѝ кажал за одењето во Босна за време на војната и учеството во напади на муслимани.
Според неа, осомничениот често имал кошмари поврзани со настаните од тој период.
Обвинителството во Милано вели дека осомничените се обвинети за убиства на цивили, вклучувајќи жени, стари лица и деца.
Истрагата за „Сараево сафари“ беше покрената по извештајот на италијанскиот новинар Ецио Гавачен, кој собрал сведоштва за странци кои платиле за да одат во Босна и Херцеговина за време на војната и, за возбуда, убивале луѓе на улиците од далеку со снајперски пушки.
