Повредената наставничка од „Рибникар“ на патерици дојде на изрекувањето на пресудата за Кецмановиќ

Чекор по чекор, потпирајќи се на патерици, тешко повредената наставничка по историја Татјана Стевановиќ денес влезе во Палатата на правдата за да присуствува на новата пресуда за Владимир и Миљана Кецмановиќ. Појавувањето на наставничката, која самата беше цел на тринаесетгодишниот напаѓач во основното училиште „Владислав Рибникар“, стана најмоќниот визуелен и емотивен симбол на денешното рочиште, на кое Вишиот суд во Белград ги потврди повеќегодишните затворски казни за родителите на момчето-убиец, пишува Телеграф.рс.

Судот го осуди таткото, Владимир Кецмановиќ, на 14 години и шест месеци затвор за тешко кривично дело против јавната безбедност и занемарување на малолетно лице, додека мајката, Миљана Кецмановиќ, беше осудена на две години и 11 месеци затвор.

Татјана Стевановиќ, која го држеше својот прв час на 3 мај 2023 година, кога ученик влегол во училницата по историја и отворил оган, го преживеала масакрот со тешки и трајни здравствени последици. За време на судската постапка, таа најде сила детално да ги опише судбоносните моменти кои траеја само две минути, но трајно променија десетици животи.

„Кон крајот на часот, слушнав нешто. Мислев дека се петарди, дека се работи за палави осмоодделенци бидејќи се ближеше крајот на учебната година. Се што можев да мислам беше дека нашиот чувар, Драган Драгиќ, ќе го реши тоа…“, рече претходно наставничката, опишувајќи ги моментите непосредно пред самата да биде застрелана повеќе пати.

Нејзиното присуство во судницата на патерици е нем сведоштво за физичката и психолошката траума низ која преживеаните сè уште минуваат. Покрај кривичната постапка, која денес го доби својот втор првостепен епилог, наставничката по историја покрена и приватна граѓанска постапка против Кецмановиќ за надомест на нематеријална штета поради стравот, болката и инвалидитетот што го претрпе, пишува српски Телеграф.

Пресуда за Кецмановиќ: Родителите на момчето убиец од „Рибникар“ одат во затвор