„Повредата е посериозна отколку што мислевме“

Шпанскиот тенисер Карлос Алкараз се повлече од турнирот во Барселона поради повреда на десниот зглоб, соопштија организаторите. Алкараз се повреди во текот на мечот против Ото Виртанен, но и покрај проблемите со зглобот, успеа да стигне до победата. Сепак, дополнителните медицински прегледи покажаа дека нема да може да го продолжи настапот на турнирот.

– Вистина е дека е чудно и тешко што седам тука по втор пат, бидејќи го направив тоа и минатиот пат. Морам да ви кажам дека морам да се повлечам од турнирот. Сите видовте што се случи на вчерашниот натпревар. Почувствував болка по едно враќање во зглобот. Постепено се влошуваше. Мислев дека нема повторно да се случи ова, дека тоа е само поради сиот напор што го имав претходната недела. Но, ги видов резултатите од тестовите и повредата е посериозна отколку што очекувавме – рече Алкараз, кој пред неколку дена го загуби финалето на мастерс-турнирот во Монте Карло, од Јаник Синер.

Тој сака да се врати на теренот што е можно поскоро, иако има многу мали шанси да биде подготвен за турнирот во Мадрид (од 22 април до 3 мај).

– Морам да го слушам моето тело и што ми кажува за да не си ја загрозам иднината. Затоа морам да се повлечам од овој турнир, кој отсекогаш бил особен за мене. Никогаш не сакам да се повлечам од турнир, особено од овој. Со голема тага ја донесов одлуката, морам да се вратам дома и да почнам со закрепнувањето со тимот, лекарите, физиотерапевтот. Ќе се обидам да заздравам што е можно поскоро и да бидам подготвен за претстојните турнири. Се надевам дека ќе бидам на теренот што е можно поскоро – заклучи Алкараз.