ТАВ Македонија ја повлече одлуката со која бесплатниот пристап на едно возило беше ограничен на еден влез во зоната „Хаг енд флај“ на Меѓународниот аеродром Скопје, во период од 24 часа. Одлуката доаѓа откако комисијата за одлучување по прекршок при Комисијата за заштита на конкуренцијата во рамките на анализата на условите и режимот за користење на зоната „Хаг енд флај“ на Меѓународниот аеродром Скопје и од ТАВ Македонија побараа дополнителни појаснувања и релевантни податоци во врска со воведеното ограничување на бесплатниот пристап.
– По доставеното барање, ТАВ Македонија ја извести Комисијата дека ја повлече одлуката со која бесплатниот пристап на едно возило беше ограничен на еден влез во период од 24 часа. Комисијата ја поздравува одлуката на ТАВ Македонија за повлекување на мерката и ќе продолжи да ги следи состојбата и условите за пристап до аеродромската инфраструктура, особено од аспект на обезбедување еднакви и недискриминаторски услови за сите учесници на пазарот – информираат од комисијата за одлучување по прекршок при КЗК.
