Поштенска марка во чест на македонскиот јазик по повод 80 години од кодификацијата

Поштата на Македонија издаде специјална поштенска марка во чест на одбележувањето на 80 години од кодификацијата на македонскиот јазик. Поштенската марка е изработена од Бирото за филателија на АД Пошта, а дизајнот е на Лариса Донев.

На денешната промоција на јубилејната поштенска марка по повод 80-годишнината од кодификацијата на македонскиот стандарден јазик, во Порта Македонија, се обрати и министерот за култура и туризам, Зоран Љутков. Рече дека со ова му оддаваме чест на нашиот македонски јазик.

– Македонскиот јазик е трајна вредност што ги преживеала времето, притисоците и обидите за негирање. Затоа оваа поштенска марка има огромно значење. Таа ќе патува по светот и ќе раскажува за осум децении јазична зрелост, за генерации писатели, поети, научници и наставници што го граделе и го збогатувале македонскиот јазик. Истовремено ќе биде и потсетник дека македонскиот јазик живее и трае. Има своја историја, своја убавина и своја сила – рече Љутков.

Директорот на Поштенски сообраќај, Бојан Кереместевски, пак, истакна дека поштенските марки се амбасадори на земјата.

– Поштенската марка нека биде доказ дека повеќе си го сакаме и почитуваме македонскиот јазик на кој се напишани безброј дела на нашите македонски автори – рече тој.

Номиналната вредност на марката е 36 денари, а испечатена е во тираж од 6 илјади примероци.