Поранешниот грчки премиер Алексис Ципрас денес објави дека официјално ќе формира нова политичка партија на 26 мај, објавува денес „Прототема“.
Во видео објавено на сметката на Ципрас на платформата „Икс“, две момчиња се појавуваат на фудбалско игралиште облечени во дресови со броевите „26“ и „5“, што симболично се однесува на датумот на формирање на новата партија.
„Ниту прерано ниту прекасно, сега е време“, рече поранешниот премиер.
Грчките медиуми објавуваат дека Ципрас во последните денови објавува видео пораки од неговите поддржувачи на социјалните мрежи во кои го повикува да се врати во активната политика, со пораки дека „март беше рано“ и „септември ќе биде доцна“.
Во исто време, според грчките медиуми, новото политичко позиционирање на Ципрас дополнително ги комплицира односите во опозицијата, особено во редовите на „ПАСОК“ и „СИРИЗА“.
Според „Прототема“, анкетите на јавното мислење покажуваат дека Ципрас има поголема поддршка од лидерот на ПАСОК, Никос Андроулакис, во некои анкети, додека некои мерења покажуваат дека новата партија на Ципрас би можела да го надмине ПАСОК.
Посебно внимание привлекува и политичкиот активизам на Марија Каристиану, поранешна претседателка на Здружението на семејства на жртвите од железничката несреќа кај Темпи, која оваа недела ќе ја презентира основачката декларација на својата партија во Солун.
Според истражувањето, Каристиана привлекува гласачи од различни политички афилијации, вклучувајќи десница, левица и центар, како и помлади гласачи кои традиционално апстинираат од избори, пренесе „Еуроњуз“.
