Поради војната на Блискиот Исток, Европа прави неочекуван потег со руската нафта

Европската Унија моментално разгледува привремено замрзнување на ограничувањата на цените на руската сурова нафта, а главната причина за овој потег е ескалацијата на конфликтот на Блискиот Исток, објави Блумберг.

Според агенцијата, евентуалното замрзнување би значело фиксирање на цената на сегашното ниво.

„Други опции што се разгледуваат вклучуваат суспендирање на динамичкото и автоматско зголемување на цените на горивата до крајот на оваа година, како и ограничување на цената на 60 долари за барел, што одговара на максималното ниво претходно поставено од групата Г7“, открија за Блумберг неименувани извори запознаени со ситуацијата.

Оваа вест доаѓа во време кога се очекуваше дека на следниот преглед на ценовните ограничувања, планиран за јули, може да има зголемување на 65 долари.

Сепак, истовремено со овие преговори, ЕУ работи и на 21-от пакет антируски санкции. Се очекува овој пакет да биде насочен кон банки, трговци со нафта, рафинерии, па дури и крипто оператори што работат во трети земји. Дури се споменуваат и можни ограничувања за околу 20 танкери за нафта кои се директно или индиректно поврзани со Русија.

Русија одговори на претходните санкции воведени од ЕУ и членовите на Г/групата и Австралија поради војната во Украина со свои ограничувања. Така, на крајот на 2022 година, рускиот претседател Владимир Путин издаде декрет со кој строго се забранува продажбата на руска нафта и нафтени деривати на странски субјекти ако договорите директно или индиректно подразбираат почитување на ценовните ограничувања. Таа забрана неодамна беше продолжена до 30 јуни 2026 година.