ПИРОМАНИТЕ ЗАД РЕШЕТКИ: 500 лица уапсени во Франција поради пожарите

Француските власти уапсија речиси 500 лица од почетокот на летото под сомнение дека на различни начини придонеле за шумските пожари. Според властите, околу 70 проценти од овие случаи вклучуваат сомневање за намерно палење, додека преостанатите 30 проценти вклучуваат небрежност или случајно палење.

Сепак, статистиката за апсењата не дава целосна слика за сите пожари во земјата. Француските податоци покажуваат дека човечкиот фактор е присутен во околу 90 проценти од случаите, но дека околу една четвртина од пожарите се намерно подметнати. Останатите пожари се главно предизвикани од отпушоци од цигари, скари, палење отпад или градежни работи.

Меѓу приведените не се само осомничени за подметнување пожар. Во некои случаи, тие се луѓе кои ги прекршиле забраните за палење пожар или предизвикале инциденти преку небрежност.

На пример, 70-годишен пензионер на југозападниот дел од земјата палел хартија и отпад во својот двор, но ја изгубил контролата врз пожарот. Тој бил казнет со 1.200 евра. Во друг случај, 29-годишен маж бил фатен како пуши во шумска област за време на највисокото ниво на опасност од пожар. Иако не подметнал пожар, му беше забранет пристап во три особено загрозени области во период од шест месеци.

Француското судство во последните недели зазема построг пристап, што предизвика критики дека зголемениот број апсења се користи и за смирување на јавноста, објавува „Ле Монд“.

Иако луѓето се главната директна причина за повеќето пожари, експертите предупредуваат дека тоа не значи дека климатските промени немаат никаква врска со нивниот обем. Рекордните температури, недостатокот на врнежи од дожд и целосно исушената почва создаваат услови во кои пожарите се шират побрзо и се многу потешки за контрола.

Анализата на организацијата World Weather Attribution покажа дека рекордниот топлотен бран на крајот на јуни речиси сигурно би бил невозможен без затоплување предизвикано од човекот.

Климатологот Раул Кордеро од Универзитетот во Гронинген проценува дека Европа успеала да го намали вкупниот број пожари благодарение на подобрата превенција и поефикасното гаснење, но дека во исто време се зголемува ризикот од екстремно брзи и големи пожари.