Вучиќ: Немам ништо против кандидатурата на Дачиќ, но СНС ќе има свој кандидат за претседател!

Српскиот претседател Александар Вучиќ денес изјави дека Српската напредна партија (СНС) ќе има свој кандидат за претседател на Србија и дека овие избори ќе бидат распишани по предвремените парламентарни избори.
Тој им изјави на новинарите во Пејаковац дека нема ништо против кандидатурата на лидерот на Социјалистичката партија на Србија (СПС) Ивица Дачиќ за претседател на Србија, која беше предложена претходно денес од неколку комитети на СПС, долгогодишен коалициски партнер на СНС.

Вучиќ не ги прецизираше датумите за распишување на предвремените парламентарни избори, а неодамна изјави дека тоа ќе биде направено за 15 до 25 дена.

„Ќе знаеме кој ќе биде нашиот претседателски кандидат по парламентарните избори“, рече Вучиќ.

Според него, до пред една година, противниците на владата секој ден велеа дека „Вучиќ се подготвува да го промени Уставот за да може повторно да биде избран за претседател“ и „тоа нема да се случи“.

Тој додаде дека илјада пати рекол дека ова не е вистина и дека го почитува српскиот Устав, според кој, патем, повеќе нема право да се кандидира и да биде претседател на Србија.

„Побаравте предвремени избори, ќе добиете предвремени избори, и ќе видиме кој ќе победи. Од едната страна ќе ги имате сите блокатори плус сите други политички партии, вклучително и СПС, а од другата страна листата на Единствена Србија (коалиции околу СНС)“, рече тој.

Вучиќ ја коментираше најавената претседателска кандидатура на претседателот на СПС, кој претходно објави дека партијата ќе учествува на парламентарните избори самостојно, или во традиционална коалиција со Единствена Србија и Зелените, со народната поговорка „Снегот не паѓа за да го покрие ридот, туку за секое животно да си ја покаже трагата“.

Порано денес, неколку локални комитети на СПС изразија едногласна поддршка за кандидатурата на Дачиќ за претседател на Србија.