Откриени нови случаи на рак кај жени со импланти

Здравствените власти во Шпанија објавија дека до крајот на 2025 година се потврдени 111 случаи на анапластичен лимфом на големи клетки поврзан со импланти за гради, ретка форма на малигнитет поврзан со овој вид медицински имплант.

Според податоците на Шпанската агенција за лекови и медицински производи (Aemps), од 2012 година, кога е воспоставен системот за следење на оваа здравствена состојба, примени се вкупно 146 пријави за сомневање за оваа болест.

Податоците се презентирани во шестиот извештај за следење на Националната програма за откривање и проучување на лимфом поврзан со импланти за гради, и се базираат на извештаи евидентирани преку системот за надзор на медицински помагала.

Најголем број пријавени случаи е регистриран во регионот Мадрид, по што следат Андалузија, Каталонија и Валенсија.

Анапластичниот лимфом на големи клетки поврзан со импланти за гради, познат како BIA-ALCL, е ретка форма на не-Хочкинов лимфом. Експертите истакнуваат дека болеста не се развива во ткивото на градите, туку во клетките на имунолошкиот систем кои можат да се формираат во ткивото околу имплантот.

Аемпс нагласува дека ова е ретка болест чија инциденца е значително помала во споредба со вкупниот број жени кои имаат импланти. Сепак, тие веруваат дека континуираното следење и раното откривање се од големо значење.

Претходните истражувања покажуваат дека развојот на болеста може да биде под влијание на неколку фактори, вклучувајќи го видот на имплантот, генетската предиспозиција и можните воспалителни процеси или контаминација за време на постапката на имплантација. Сепак, научниците сè уште не ја утврдиле точната причина за овој лимфом или прецизниот механизам на неговиот развој.