Општина Центар, во соработка со Сојузот на специјални едукатори и рехабилитатори, е првата општина во државата што на организиран начин спроведува обука на воспитно-згрижувачкиот кадар и на стручните служби во детските градинки за рана детска интервенција.
Преку проектот на СОРИД, наменет за деца до шестгодишна возраст, се нуди поддршка за рана интервенција, како и поддршка на семејствата. За сите родители што сакаат да се вклучат, се прави индивидуална процена на детето и на потребите на семејството, по што се изготвува индивидуален семеен план за поддршка (ИСПП), со континуирана поддршка од стручно лице.
– Oваа обука ја спроведуваат стручни лица во нашите градинки. Крајна цел е вработените да создаваат поттикнувачка средина за децата, да знаат како да ги препознаат тешкотиите во нивниот развој и навремено да ги информираат родителите за да им се даде соодветна помош на оние на кои им е потребна – изјави градоначалникот на Општина Центар, Горан Герасимовски.
