Светската здравствена организација (СЗО) побара информации од руските власти во врска со медиумските извештаи дека уште еден лабораториски работник боледува од пневмонија со неодредено потекло.
СЗО исто така побара дополнителни податоци за да се разјасни причината за тешката пневмонија и да се идентификува патогенот што доведе до спроведување на мерки за јавно здравје, пренесе Ројтерс.
Руската агенција за здравствен надзор соопшти дека не се откриени случаи на чума меѓу лицата кои биле во контакт со лабораторискиот работник од Iнститутот за истражување на антракс, кој почина минатата недела.
Лабораториска работничка во Институтот за истражување против чума во Иркутск, југоисточен Сибир, почина на 2 октомври под околности кои остануваат нејасни, а како причина за смртта беше наведена „пневмонија со непозната етиологија“.
Дарија Шипилова (28), која работела во истражувачкиот институт, на 25 септември скршила епрувета што содржела патоген на пневмонична чума, објавија претходно локалните медиуми.
Шипилова потоа била примена во болница на 29 септември со симптоми на тешка пневмонија и починала во текот на ноќта меѓу 1 и 2 октомври.
Руски власти: Нема докази дека болеста е поврзана со патогенот
Руските власти изјавија дека не нашле докази оти нејзината болест била предизвикана од некој од патогените со кои таа работела и нагласија дека ситуацијата е под контрола. Болницата каде што се лекувала работничката е ставена во карантин, додека околу 200 луѓе кои биле во контакт со неа се под строг медицински надзор.
Песков: „СЗО е информирана“
Дмитриј Песков, портпарол на рускиот претседател Владимир Путин, вчера изјави дека Светската здравствена организација (СЗО) е информирана за епидемиолошката ситуација во регионот Иркутск, каде што минатата недела почина лабораториски работник од она што медиумите го идентификуваа како пневмонична чума.
Одговарајќи на прашањата на новинарите за ситуацијата во регионот, Песков ја повтори потребата да се потпреме на изјавите и информациите од Руската федерална служба за надзор на заштитата на правата на потрошувачите и благосостојбата на луѓето („Роспотребнадзор“).
Тој додаде дека „Роспотребнадзор“ во вторникот на својата веб-страница објавил дополнителни, подетални информации за ситуацијата. „Светската здравствена организација беше соодветно информирана, во согласност со воспоставената практика“, изјави Песков.
Воведени се антиепидемиски мерки
Гувернерот на Иркутската област, Игор Кобзев, претходно објави дека во областа Ангарск е откриена опасна заразна болест, што доведе до воведување низа антиепидемиски мерки и засилен надзор над ситуацијата.
Регионалната влада одржа итен состанок на санитарно-антиепидемиската комисија, на кој присуствуваше и раководителката на „Роспотребнадзор“, Ана Попова.
„Роспотребнадзор“: Нема докази за инфекција поврзана со работата
Сепак, „Роспотребнадзор“ соопшти дека кај вработената во Институтот за истражување на чума во Иркутск, за која претходно беше пријавено дека е заразена, не се пронајдени микроорганизми поврзани со нејзините професионални активности.
Испитувањата на лицата кои биле во контакт со неа, исто така, не покажаа здравствени промени поврзани со некоја заразна болест. Агенцијата нагласи дека санитарно-епидемиолошката состојба во Иркутската област е стабилна.
