Неодамнешните случувања во Сеута го вклучија алармот: ЕУ предложи план од пет точки за зајакнување на безбедноста на надворешните граници

Европската комисија денес предложи план од пет точки за спречување, предвидување и реагирање на ненадејни, масовни пристигнувања на мигранти, со цел да се зајакне отпорноста и безбедноста на надворешните граници на ЕУ.

Иако бројот на илегални преминувања на мигрантите на границите на ЕУ е на најниско ниво од 2021 година, неодамнешните настани во Сеута – кои покажаа како ненадејните пристигнувања можат да предизвикаат криза – ги ставија границите на ЕУ на тест. Тие исто така истакнаа, како што напомена претседателката на Комисијата, Урсула фон дер Лајен, во нејзиниот говор за состојбата на Унијата претходно овој месец, дека алатките за заштита на надворешните граници мора да еволуираат.

Потпретседателката на Комисијата за технолошки суверенитет, безбедност и демократија, Хена Виркунен, изјави дека посилна Европа започнува со посилни надворешни граници.

„Преку користење на дигитални алатки, подобрена размена на податоци и паметна технологија, ЕУ ги поддржува граничните служби на земјите-членки во поефикасно управување со границите, борбата против прекуграничниот криминал и обезбедувањето на безбедноста на надворешните граници на Унијата“, рече Виркунен.

Комисијата објави дека, како одговор на настаните во Сеута, Фон дер Лајен идентификувала пет клучни области за дејствување на ЕУ, притоа наведувајќи конкретни мерки за различни чинители и повикувајќи на проширување на постоечките алатки и рамки – или на создавање нови таму каде што е потребно.

Првата точка од планот се фокусира на зајакнување на соработката со партнерските земји за спречување на нерегуларната миграција; приоритетите вклучуваат справување со основните причини за нерегуларната миграција, зајакнување на управувањето со кризи во рамките на новите и постоечките партнерства, поттикнување поблиска соработка со„Фронтекс“, „Европол“ и „Евроџаст“, како и развој на европскиот систем за надзор на границите.

Следната точка се однесува на зајакнување на надворешните граници на ЕУ, што подразбира поддршка за откривање и реагирање на идни вонредни ситуации и кризи, додека третата точка се занимава со подобрувања во мониторингот, ситуационата свест и системите за рано предупредување.

Четвртата точка од планот вклучува демонтирање на мрежите за шверц на мигранти и трговија со луѓе, а петтата се фокусира на забрзување на враќањето на нерегуларните мигранти – вклучително и преку подобрена соработка за реадмисија со трети земји и проширена улога на „Фронтекс“ во враќањето на државјани на трети земји кои немаат право да останат во ЕУ.

Комесарот на ЕУ за миграција, Магнус Брунер, изјави дека ЕУ ќе ги зајакне темелите што се потпираат на цврсти надворешни граници, ефикасна миграциска дипломатија, Пактот за миграција и азил и кредибилен процес на враќање на мигранти преку зајакнување на Фронтекс, предлагање нова европска рамка за одговор на кризи и продлабочување на партнерствата со земјите на потекло и транзит.

Планот од пет точки ќе им биде презентиран на земјите-членки на ЕУ на Советот за правда и внатрешни работи на 1-ви и 2-ри октомври.