Седиштето на НАТО во Брисел денеска соопшти дека Русија нема причина за загриженост поради нуклеарната вежба што треба да се одржи во Италија од 13 до 23 октомври.
Во соопштението се наведува дека на оваа годишна вежба ќе учествуваат 17 сојузници. Вежбата се одржува по размената на писма меѓу Москва и НАТО – размена што уследи откако членките на НАТО во август спроведоа вежби во близина на руската енклава Калининград.
„Ова го спроведуваме секоја година, а пораката до земјите како Русија е јасна: нема причина за загриженост. Ова е предвидливо и нема причина за погрешни проценки“, изјави Насима Баруз, директорка за нуклеарна политика во НАТО, како што пренесува „Политико“.
„Целта на вежбата е првенствено обука на сојузничките сили за да останеме подготвени и да ја обезбедиме сигурноста на нашите нуклеарни капацитети“, додаде таа.
По вежбите на НАТО во близина на Калининград, Москва испрати писмо во кое се закануваше со напади врз територијата на сојузниците и го спомна користењето на својот нуклеарен арсенал.
Полковникот од американската армија Дејвид Бул, раководител за нуклеарни операции во НАТО, изјави дека учеството во вежбата е „слично“ на она од претходните години и истакна дека таа опфаќа сè – од „симулирани тревоги до вежби со летови во реални услови“ – но без „употреба на вистинско нуклеарно оружје“.
Во вежбата ќе бидат вклучени авиони со двојна намена – способни да носат и конвенционално и нуклеарно оружје – како и копнени трупи кои ќе обезбедуваат поддршка и ќе спроведуваат обука за товарење, полнење гориво и одржување на авионите.
