НАТО потврди дека пресретнал ракета насочена кон Турција

НАТО потврди дека пресретнал уште една ракета насочена кон Турција. Претходно, Турција денеска соопшти дека нејзината воздушна одбрана соборила втора балистичка ракета испукана од Иран што влегла во турскиот воздушен простор, предупредувајќи дека ќе преземе сите потребни чекори за справување со заканите.

Тоа е втора иранска балистичка ракета во изминатата недела што се заканува на југот на членката на НАТО, Турција. Анкара во саботата го предупреди Иран да не ги повторува ваквите напади, но не побара формално од своите сојузници посилна заштита.

NATO has again intercepted a missile heading to Türkiye. NATO stands firm in its readiness to defend all Allies against any threat

— NATO Spokesperson (@NATOpress) March 9, 2026

„Повторуваме дека сите потребни мерки ќе бидат преземени решително и без двоумење против каква било закана насочена кон територијата и воздушниот простор на нашата земја“, соопшти турското Министерство за одбрана, додавајќи дека дел од остатоците паднале во југоисточната покраина Газиантеп, но дека немало жртви.

„Исто така, повторуваме дека е во интерес на сите да се послушаат предупредувањата на Турција во овој поглед“, се вели во соопштението.

Не е јасно каде се движела ракетата пред да биде пресретната од силите на НАТО стационирани во источниот Медитеран.

Американските воздухопловни сили се стационирани во базата Инџирлик во јужна Турција, додека североисточната покраина Малатија е дом на радарска база на НАТО која обезбедува витална заштита на алијансата. Анкара соопшти дека фрагментите од ракетата паднале на празни полиња во Газиантеп, кој се наоѓа приближно помеѓу двете бази.

Бурханетин Дуран, портпаролот на претседателот Реџеп Таип Ердоган, изјави дека Анкара го повторува своето силно предупредување до сите страни, особено до Иран, да избегнуваат чекори што ја загрозуваат регионалната стабилност и цивилите.

Анкара тврди дека Вашингтон не го користи Инџирлик во своите заеднички воздушни напади врз Иран со Израел, поради којшто Техеран возврати со напади со ракетни и беспилотни летала низ целиот регион.