Најмалку 87 тела пронајдени по потонувањето на ирански воен брод кај Шри Ланка

Морнарицата на Шри Ланка соопшти дека досега се пронајдени најмалку 87 тела откако ирански воен брод потона во Индискиот Океан, кој беше потопен од американските сили за време на воена операција во меѓународни води.

Според командантот на морнарицата на Шри Ланка, Будика Сампат, спасувачките екипи не го пронашле бродот кога пристигнале на местото на настанот, само траги од нафта и сплавови за спасување.

„Кога пристигнавме на местото на настанот, немаше никакви знаци од бродот, само нафтени дамки и сплавови за спасување. Најдовме луѓе како пловат во водата“, рече Сампат во соопштение објавено од Асошиејтед Прес.

Телата на пронајдените членови на екипажот моментално се транспортираат на копно, додека потрагата по исчезнатите продолжува.

Властите на Шри Ланка претходно соопштија дека 32 лица се спасени и однесени во болница, a се верува дека на бродот имало околу 180 членови на екипажот, изјави министерот за надворешни работи на Шри Ланка, пред парламентот.

Министерот за одбрана на САД, Пит Хегсет, потврди дека иранскиот воен брод бил потопен од американска подморница со торпедо во меѓународните води во Индискиот Океан.

Хегсет додаде дека тоа е првото потопување на непријателски брод со торпедо, од Втората светска војна наваму.

Иако Пентагон официјално не го именувал бродот, морнарицата на Шри Ланка претходно изјави дека станува збор за иранската фрегата ИРИС Дена, која потона во водите јужно од Шри Ланка.

Американските претставници велат дека нападот бил дел од поширока воена операција против Иран, додека потрагата по преживеани продолжува во областа на инцидентот.