Најлош ден во историјата за „Гугл“

Акциите на „Алфабет“ (Alphabet), матичната компанија на „Гугл (Google), вчера го забележаа својот најголем еднодневен пад во историјата на компанијата. Нивната вредност се намали за речиси 13 отсто, со што пазарната капитализација на Alphabet се намали за приближно 500 милијарди долари. Оваа масовна продажба беше поттикната од разочарувачките финансиски резултати, забавувањето на растот на приходите од онлајн пребарувањето, како и од зголемената загриженост кај инвеститорите во врска со огромните трошоци поврзани со развојот на вештачката интелигенција, пренесува „Волстрит џурнал“..

Акциите на Alphabet ја завршија трговската сесија на ниво од 283,82 долари, што претставува пад од 12,64 отсто. Ова е втора по големина еднодневна загуба на пазарна вредност за која било компанија во историјата на американскиот берзански пазар. Само Nvidia забележа поголем пад – во јануари 2025 година – кога изгуби приближно 593 милијарди долари од својата вредност.

Падот на матичната компанија на Google повлече надолу и други американски берзански индекси, особено технолошки ориентираниот индекс Nasdaq. Инвеститорите беа особено загрижени поради резултатите од бизнисот со рекламирање на Google, кој со децении претставува главен извор на приходи и профит за компанијата.

Во третиот квартал, приходите од бизнисот со онлајн пребарување на Google пораснаа за 12 отсто во споредба со истиот период минатата година. Иако ова претставува раст, тој е значително побавен од темпото забележано претходно во текот на годината; приходите од пребарување пораснаа за 19 отсто во првиот квартал и за 17 отсто во вториот. Дивизијата „Google Services“ – која ги опфаќа интернет пребарувањето, YouTube и претплатите – оствари приход од 96,3 милијарди долари, што е под очекувањата на аналитичарите кои предвидуваа 98,5 милијарди долари.

Вкупните приходи на Alphabet достигнаа 127,6 милијарди долари – зголемување од 25 отсто на годишно ниво – но сепак под очекувањата на „Волстрит“. Нето-добивката се намали за 25 отсто, на 26,17 милијарди долари.

Овие резултати, кои се послаби од очекуваните, отворија прашања за тоа дали Google ќе може да ги задржи своите историски високи приходи од рекламирање, со оглед на тоа што вештачката интелигенција го менува начинот на кој луѓето го користат интернетот.

Google се соочува со предизвик што, делумно, сам го создал преку сопствениот развој на вештачка интелигенција.

Неговата традиционална функција за пребарување на интернет функционира така што на корисниците им прикажува линкови до веб-страници, вклучително и платени огласи. Огласувачите плаќаат кога корисниците ќе кликнат на овие огласи.

Сепак, сè поголем број корисници доаѓаат до информации директно преку одговори генерирани од вештачка интелигенција, со што се елиминира потребата за посета на други веб-страници. Како одговор на тоа, Google почна да го проширува својот режим на пребарување заснован на вештачка интелигенција, кој на корисниците им нуди одговори генерирани од вештачка интелигенција, наместо вообичаената листа на резултати од пребарувањето.

Проблемот е во тоа што, засега, компанијата заработува помалку од овој тип на пребарувања отколку од традиционалното пребарување. Филип Шиндлер, главниот деловен директор на Google, за време на дискусија со аналитичари потврди дека пребарувањата направени во „режимот со вештачка интелигенција“ моментално генерираат помал приход од огласување во споредба со стандардните пребарувања.