Мицкоски: Ако растат цените, ќе ги намалиме акцизите на нафтата

Владата, како никоја друга држава во Европа, директно од буџетот, во следните две недели, ќе интервенира од буџетот за да го намали ДДВ од 18 на 10 %, истакна премиерот Христијан Мицкоски и најави нови мерки ако продолжи растот на цените на нафтата, вклучително и намалување на акцизите и на маржите.

– Владата ја следи состојбата со цените на нафтата и доколку продолжи растот на берзите по истекот на двонеделната мерка за намалување на ДДВ од 18 на 10 отсто, доколку продолжи растот, следна мерка ќе биде намалување на акцизите и на маржата, односно цената на складирање и на транспортните трошоци – истакна Мицкоски.

Тој нагласи дека Владата има мерка за следните две недели, како ниедна друга држава во Европа, директно од буџетот за намалување на ДДВ од 18 на 10 проценти.

– И понатаму ќе ја следиме состојбата и врз основа на тоа, во периодот што следува, ќе интервенираме – нагласи Мицкоски.

Прашан дали Владата ќе преземе мерки доколку има раст на цените на храната, Мицкоски посочи дека 30 тима од Државниот пазарен инспекторат се на терен и доколку забележат непазарно однесување, ќе дејствуваат.

– Триесет тима од Државниот пазарен инспекторат се на терен. И повторно тука, од страна на опозицијата манипулираат дека се посетуваат различни видови маркети. Се гледаат сите трошоци и врз основа на тие трошоци, носиме стратегија и политика. Нормално, таму каде што ќе видиме дека постои непазарно однесување, ќе дејствуваме како Влада – истакна Мицкоски.