Јордан ја нападна Сирија: Кралот Абдула Втори нареди одмазда за масакрот во црква

Јордан изврши воздушни напади врз вооружени групи во Сирија, како одговор на нападот врз грчка православна црква во јужниот јордански град Карак – инцидент во кој во петокот загинаа девет лица – соопшти јорданското воено воздухопловство, пренесува „Асошиејтед прес“.

Во соопштението се наведува дека операцијата „резултирала со убивање и ранување на голем број припадници на овие терористички групи, како и со уништување на неколку нивни возила“. Не беше прецизирано кои групи биле цел на нападите, ниту пак беа наведени точните локации каде што биле извршени.

Сириските државни медиуми објавија дека при бомбардирањето имало цивилни жртви. Директорот на здравствените служби во јужната провинција Дера – каде што се случиле нападите – изјави за државната новинска агенција САНА дека загинале најмалку пет цивили, меѓу кои жени, деца и еден 65-годишен маж.

Претходно во понеделникот, јорданските власти уапсија тројца мажи осомничени за вмешаност во нападот врз црквата минатата недела, во кој загинаа девет лица, а повеќе од 20 беа ранети. Претставници на властите изјавија дека апсењата уследиле по престрелка во зори, при што сите тројца осомничени биле ранети.

Нападот се случи во петокот за време на погреб во грчка православна црква во Карак – град што се наоѓа на околу 90 километри јужно од главниот град Аман и во кој живее христијанско малцинство.

Злосторството ја потресе целата земја, поради што Јордан прогласи тридневна жалост за жртвите. Ниту една група веднаш не презеде одговорност за нападот, а мотивот на напаѓачите остана непознат.

Подоцна во текот на понеделникот, Дирекцијата за јавна безбедност на Јордан ги идентификуваше уапсените како браќата Хазах Заидан Мохамед и Мишал Заидан Мохамед, заедно со нивниот зет, Ахмед Сами Хусеин.

Сите тројца се јордански државјани и беа уапсени во Карак, јужно од Аман.

Директорот на Дирекцијата за јавна безбедност ги опиша напаѓачите како „такфири“ – термин што се користи за сунитски екстремисти – но нагласи дека тие не се поврзани со ниту една организирана група.

The Deraa countryside was hit by Jordanian warplane airstrikes, with civilian deaths reported. #Jordan #Syria #Deraa #Airstrikes #CivilianCasualties #Warplanes #SouthernSyria #Conflict #BreakingNews https://t.co/FpdzlrIXvC

— SNN Finland (@snnfinalnd) October 26, 2026

Тој додаде дека во напуштената куќа, каде што јорданските сили ги фатија осомничените, била пронајдена голема количина муниција.

Јорданскиот министер за внатрешни работи, Мазен ал-Фараја, изјави дека нападот извршен од тројцата мажи е резултат на „терористички и екстремистички начин на размислување“.

„Ако не се бориме против ваквиот начин на размислување, повторно ќе бидеме сведоци на слични инциденти“, им рече тој на новинарите.

Јорданскиот крал Абдула Втори претходно им нареди на властите да одговорат со „железна тупаница“ против оние што ги нарече отпадници од исламот, како и против секој што се обидува да го поткопа единството на јорданскиот народ. „Ветувавме дека терористите нема да избегаат од казна и дека нема да толерираме ниту еден поборник на мрачните идеологии што ги разединуваат Јорданците“, наведе кралот во соопштението објавено во понеделникот.

Членовите на семејствата на жртвите изјавија дека веста за апсењето на осомничените им донела одредено олеснување.

„И покрај длабоката и огромна трагедија, она што се случи денес ја ублажи нашата тага – како и тагата на јорданскиот народ – и тоа не само за нас, семејствата на загинатите“, изјави за телевизијата „Ал Мамлака“ Калид ал-Боркан, кој го преживеа нападот, но во него изгуби тројца роднини.