Ќе бидам изненадена ако Ѓоковиќ освои грен-слем титула на овие години

Поранешната американска тенисерка, Крис Еверт, има свое предвидување за шансите на Србинот Новак Ѓоковиќ на претстојните грен-слем турнири. Тенисерката, која 18 пати ги крена трофеите на големите турнири, не му дава многу шанси на олимпискиот шампион од Париз, но додаде дека никогаш нема да го отпише.

Новак Ѓоковиќ го освои последниот грен-слем во 2023 година, на Отвореното првенство на САД. Тој ќе наполни 38 години на 22 мај и ќе има можност повторно да испише историја во тенисот, но само со освојување на голем турнир. Рафаел Надал и Роже Федерер ги освоија грен-слем турнирите на 36 години, како и Новак Ѓоковиќ, кој доколку успее да крене уште еден, 25. трофеј, ќе биде најстариот победник на големо натпреварување. Тој ќе има можност за тоа во Париз, на Ролан Гарос, кој е на програмата од 25 мај до 8 јуни. Пред патувањето во Франција, ќе може да се загрее на турнирот во Женева, но се чини дека не е доволно тоа за Американката. За потенцијалната титула на Новак Ѓоковиќ, поранешната тенисерка рече: „Никогаш не би го потценила, но би била изненадена ако освои уште еден голем турнир, да кажеме така“.

На последните пет турнири, Новак Ѓоковиќ ги загуби првите натпревари на четири од нив. Неговата форма е причина за недоверба кај многумина, вклучувајќи ја и поранешната американска тенисерка: „Мора да му оддадете признание на овој човек. Овој човек има освоено сè, повеќе од кој било друг. Никогаш не би рекла дека нема да победи, но би била изненадена. Го видов како игра брилијантно на трева, толку многу пати го освои Вимблдон, па не можам да кажам: „Не, нема да освои друг“. Не мислам дека ќе биде Ролан Гарос, но никогаш не може да го отпишете“.

Новак е свесен и дека неговата игра не е на врвно ниво.

– Очигледно е дека денес ми е тешко да ги постигнам резултатите што ги имав кога бев во најдобра форма. Тоа не значи дека никогаш повеќе нема да можам да го направам тоа. Тенисот е спорт каде што мора да го негувате тој менталитет „никогаш не е доста“. Бидејќи штом ќе биде доста, навистина е доволно и мора да го спуштите рекетот. Јас сè уште не чувствувам дека е доволно за мене – изјави Ѓоковиќ за „Бизнис травелер“.

Која е Крис Еверт?

Крис Еверт е поранешна американска тенисерка што освои дури 18 грен-слем турнири, а најмногу доминираше на Ролан Гарос, каде што освои седум, и на Отвореното првенство на САД, каде што победи шест пати. Таа се смета за една од најуспешните тенисерки на сите времиња, бидејќи беше на врвот од ВТА-листата 260 недели.

Во сингл, таа освои 157 титули, а во текот на кариерата најголема соперничка ѝ беше Мартина Навратилова. Заедно доминираа во спортот од средината на 1970-тите до средината на 1980-тите. Еверт има втор највисок процент на победи на натпреварите во сингл, победувајќи 1.309 пати и губејќи само 146 пати, што е 89,97 проценти. Таа имаше успех и во двојки, кревајќи ги трофеите на големите турнири три пати, двапати на Ролан Гарос и еднаш на Вимблдон. По завршувањето на кариерата, работеше и како тренер.