Тим лекари од Институтот за кардиоваскуларни заболувања „Дедење“ и Институтот за здравствена заштита на мајките и децата „Д-р Вукан Чупиќ“ успешно имплантираа вештачко срце кај тринаесетгодишен пациент од Сараево. Момчето, кое доби вештачко срце поради сериозно срцево заболување, се опоравува добро, а лекарите велат дека оваа интервенција, прва во Србија и во овој регион, му го продолжила животот и му дала можност да ja дочека неопходната трансплантација на срце.
Кардиохирургот Саша Боровиќ истакна дека има малку центри во светот кои вршат вакви процедури.
– Се осмеливме да ги поместиме границите на медицината во оваа институција, и благодарение на нашата заедничка работа и искуство, успеавме да го постигнеме тоа – изјави Боровиќ за РТС.
Боровиќ истакна дека, со оглед на возраста на пациентот, ова е една од најретките процедури од ваков тип.
– Со оглед на возраста на детето, ова е трет ваков случај во светот. Двајца помали пациенти беа оперирани во САД во врвни центри, а третиот сега е направен во Србија – нагласи Боровиќ, пренесува РТС.
Покрај кардиохирурзи и кардиолози, во зафатот учествуваа анестезиолози, лекари од интензивна нега и медицински сестри.
Директорот на Институтот за заштита на здравјето на мајките и децата, Владислав Вукомановиќ, нагласи дека вештачкото срце не е конечно решение, туку „мост“ до трансплантација, што ќе биде потребно кога ќе се појави соодветен донор.
– Многу е важно механичката поддршка да се обезбеди навреме. Може да трае од неколку месеци до неколку години, па затоа се надеваме дека нашиот мал пациент успешно ќе добие трансплантација на срце – рече Вукомановиќ.
