„Исфрлете го Салах од тимот, не пуштајте го да се приближи до стадионот!“

Поранешниот напаѓач на Манчестер јунајтед, Вејн Руни, вели дека напаѓачот на Ливерпул, Мохамед Салах, бил „себичен“ и треба да биде изоставен од составот за последниот натпревар на „црвените“ во сезоната, против Брентфорд, на „Енфилд“.

Салах рече дека Ливерпул мора да се врати на тоа да биде „хевиметал напаѓачки тим од кој се плашат противниците“, по поразот од 4:2 од Астон вила, што го доведе во прашање неговиот квалификациски пласман во Лигата на шампионите.

– Ова е фудбалот што знам да го играм и тоа е идентитетот што треба да се врати и да се зачува засекогаш. Тоа не е нешто за што може да се преговара и секој што ќе му се приклучи на овој клуб, треба да се приспособи на тоа – напиша Салах во објава на социјалните мрежи, која беше протолкувана како критика кон Слот.

Египетскиот напаѓач ќе го напушти Ливерпул на крајот од сезоната, откако постигна 257 гола и му помогна на клубот да освои шест големи трофеи за девет години, но легендата Вејн Руни рече не треба да добие шанса да се збогува со навивачите на „Енфилд“.

Во шоу, Вејн Руни рече: „Жал ми е што на крајот го направи и го постигна во Ливерпул. Не е поентата повторно да излезе и да го нападне Слот“.

– Тој сака да игра хевиметал фудбал, па, во основа, вели дека го сака фудбалот на Јурген Клоп. Не мислам дека може Мо Салах да се справи со таков фудбал. Мислам дека неговите нозе престанаа да играат со тоа високо темпо и со голем интензитет. Да бев Арне Слот, немаше да го пуштам никаде во близина на стадионот, на последниот натпревар. Тоа го имав со Алекс Фергусон. Имав несогласување и расправија, а на последниот натпревар на Олд Трафорд, тој ме исфрли од тимот поради тоа.

Поранешниот капитен на „црвените ѓаволи“ не застана тука со критиките кон Салах.

– Мислам дека Салах се обидува да се оправда и да ја ублажи својата вина затоа што имаше многу лоша сезона. Затоа мислам дека беше многу себичен во она што го направи во тие два наврати. Штета е и навивачите ќе бидат на негова страна, но мислам дека кога ќе погледнете подлабоко и откако ќе бидете во соблекувалната во слична ситуација, Мо Салах точно знае што прави. Тоа е твојот менаџер. Не можеш јавно да го омаловажуваш двапати како што направи тој и да се извлечеш неказнето. И токму таму, да бев Арне Слот, ќе морав да го повлечам чкрапалото и само да кажам: „Гледај, нема да дојдеш никаде блиску до стадионот в сабота, без разлика дали ти се допаѓа или не“. Навистина се сомневам дека ќе го стори тоа, но мислам дека треба. Штета е да се види како една од големите икони на Премиер лигата ја напушта Премиер лигата во оваа ситуација – заврши Руни.