Иран го објави главниот услов за крај на војната

Иран не барал прекин на огнот, изјави министерот за надворешни работи Абас Аракчи, и сака секој крај на војната со Израел и САД да биде конечен, објави полуофицијалната новинска агенција Students News Network.

Аракчи додаде дека Ормускиот теснец е затворен „само за непријатели и оние кои ја поддржуваат нивната агресија“.

Портпаролот на Министерството за надворешни работи додаде дека бродовите од земјите кои не се вклучени во војната можат да поминат низ теснецот во координација и со одобрение на иранските сили.

Околу една петтина од светската нафта и течен природен гас обично поминува низ Ормускиот теснец, кој е ефикасно затворен со недели откако започна американско-израелската војна против Иран на 28 февруари, објави Хина.

Претседателот на САД, Доналд Трамп, во саботата ги повика Кина, Франција, Јапонија, Јужна Кореја, Велика Британија и другите земји погодени од ограничувањата за испорака на нафта преку Ормускиот теснец да се приклучат на напорите за повторно отворање на водниот пат.

Франција се стреми да состави коалиција за обезбедување на теснецот откако ќе се стабилизира безбедносната ситуација, додека Велика Британија разговара за низа опции со сојузниците за да се обезбеди безбедноста на бродовите, соопштија официјални лица.

Прерано е да се каже дали ЕУ како блок би можела да игра улога во таква иницијатива, изјавија дипломати и службеници.

Јапонија и Австралија во понеделник изјавија дека нема да учествуваат во мисијата во Ормутскиот теснец.