Имам здравствени проблеми што ме мачат веќе неколку години

Српскиот тенисер Новак Ѓоковиќ сензационално беше елиминиран во првото коло на мастерсот во Синсинати. Тој загуби од Аргентинецот Тијаго Августин Тиранте со 2:6, 6:4, 6:4. Ова е еден од најшокантните порази во кариерата на српскиот ас, со оглед на тоа што Тиранте во моментов се наоѓа на 50. место на АТП-листата. Покрај тоа, ова е првпат по 2007 година да загуби во воведното коло во Синсинати.

– Пред сè, му честитам на противникот. Искрено, ова воопшто не беше пријатен меч за мене. Така се чувствував. Не беше првпат, а претпоставувам дека нема да биде ни последен, но што е, тука е – рече Ѓоковиќ по мечот.

Температурата во Синсинати беше 28 степени, но влажноста на воздухот дури 80 проценти. Ѓоковиќ беше прашан дали временските услови му создале проблем.

– Не, едноставно во прашање е здравствен проблем што го имам. Ме мачи последниве неколку години. Имам многу проблеми, особено кога има голема влажност на воздухот и кога е топло.

Ѓоковиќ вели дека бил свесен дека ќе биде во неповолна позиција поради временските услови.

– Да, бев свесен за тоа. Но тука се и други работи, нервозата и сè друго што оди со мечот. Сето тоа дополнително ја влошува ситуацијата, и токму тоа се случи.

Со овој пораз, Ѓоковиќ го завршува својот настап во Синсинати и ќе има само две недели целосно физички да закрепне и да се подготви за последниот гренд слем турнир во сезоната, САД Опен, кој почнува на 30 август.