Хибридна војна во полн ек: Естонија откри рекорден број руски агенти

Во текот на 2025 година, Естонија откри рекорден број соработници поврзани со Русија, објави Службата за внатрешна безбедност (КАПО).

Во најновиот годишен извештај, најмалку девет лица беа идентификувани како „агенти“, а неколку свештеници поврзани со Руската православна црква останаа без дозвола за престој од безбедносни причини. Вкупниот број на лица осомничени дека работеле за Кремљ, а кои биле приведени или депортирани за промовирање на руските интереси, не е објавен, наведува Политико.

Според извештајот на КАПО, невоените закани како што се саботажа, шпионажа и информативни кампањи стануваат сè поизразени. Активностите вклучуваат лажни дојави за бомби, но и виртуелни „напади“ преку платформата Телеграм.

Особено се издвојуваат кампањите за дезинформации насочени кон пограничниот град Нарва, каде што се наоѓа мнозинството жители што зборуваат руски. Во последните недели, вниманието е насочено кон онлајн кампањата што се залага за отцепување на Нарва и околниот округ Ида-Виру.

Естонскиот премиер Кристијан Михал јавно ги осуди ваквите активности, нарекувајќи ги „информативна операција создадена од Русија за поттикнување раздор“.

Во извештајот се наведува дека спротивната страна ги смета ваквите кампањи за успешни кога се известуваат и засилуваат од мејнстрим медиумите, бидејќи тоа го зголемува нивниот кредибилитет и досег.

Естонските безбедносни служби предупредуваат дека руските разузнавачки операции сè повеќе се спроведуваат од далечина и со тајна употреба на цивили. Еден пример е регрутирањето на пензионери кои фотографирале штета на советските споменици, а материјалот потоа бил користен за пропагандни цели.

Зголемениот број на откриени оперативци не мора да значи поголем интензитет на руските активности, но, како што е наведено, ја покажува ефикасноста на естонскиот безбедносен систем.

„Вкупното ниво на закана не се променило. Главниот непријател на Естонија останува Русија со својот империјален начин на размислување“, се заклучува во извештајот.