Хегсет најави ревизија на американските сили во Европа

Американскиот министер за одбрана, Пит Хегсет, најави шестмесечна ревизија на распоредувањето на американските сили во Европа и предупреди дека САД би можеле да преиспитаат дел од своите обврски кон НАТО доколку сојузниците не ги исполнат обврските за зголемување на одбранбените трошоци.

Говорејќи на состанокот на министрите за одбрана во Брисел, Хегсет истакна дека ревизијата ќе биде темелна и ќе има цел Европа да преземе поголема одговорност за сопствената безбедност. Тој нагласи дека НАТО треба да се развива како силен воен сојуз во кој европските земји ќе имаат водечка улога во конвенционалната одбрана на континентот.

Хегсет ги критикуваше и сојузниците кои не ги поддржале САД за време на конфликтот со Иран, посочувајќи дека Вашингтон ќе настојува да обезбеди непречено стационирање и прелет на своите сили. Изјавите доаѓаат во период кога НАТО се соочува со предизвици во пополнувањето на воените капацитети, а САД веќе најавија намалување на дел од своето воено присуство и поддршка во рамките на Алијансата.