Гутереш: ОН активно соработуваат со Комитетот за мир само за Газа, сè друго е личен проект на Трамп

Генералниот секретар на Обединетите нации, Антонио Гутереш, изјави дека светската организација активно соработува со соперничкиот Комитет за мир на претседателот на Соединетите Американски Држави, Доналд Трамп, но само за Газа, и дека сè надвор од тоа е личен проект на Трамп.

Гутереш изјави за бриселскиот портал „Политико“ дека ја поздравува целта на Комитетот на Трамп за финансирање и исполнување на основите на планот за реконструкција на палестинските домови и инфраструктурата во Појасот Газа.

– Постои цел што ја дефинираше тој и ја одобри Советот за безбедност и ние активно соработуваме со структурите што ги создаде Комитетот за мир – рече Гутереш.

Сепак, генералниот секретар ги доведе во прашање пошироките амбиции на организацијата, која Трамп ја опиша како алтернатива, како што рече, на неуспешните меѓународни институции во септември минатата година, кога ја лансираше.

Гутереш рече дека, освен планот за реконструкција на Газа, не гледа потреба од комитет на Трамп.

– Сè друго сега е личен проект на претседателот Трамп, каде што тој има целосна контрола врз сè – рече тој.

Гутереш додаде дека „ова не е ефикасен начин за решавање на драматичните проблеми што ги имаме сега“.

– Мора да бидеме јасни во врска со меѓународното право, да бидеме јасни во врска со вредностите на Повелбата на Обединетите нации. Тоа е неопходно во секоја мировна иницијатива – рече тој.

Генералниот секретар ја бранеше улогата на ОН во конфликти како што е кризата во Ормутскиот Теснец, сугерирајќи дека неговата организација би можела да биде дел од план за деескалација на нападите и за заштита на водниот пат.

– Мојата главна цел е да видам дали е можно да се создадат услови во Ормутскиот Теснец слични на оние што постоеле во минатото – рече тој, додавајќи дека ОН се во контакт со клучните играчи во Персискиот Залив, како и со Европскиот совет.

Тој додаде дека ОН „формирала работни групи што ќе можат да го сторат тоа“.

– Но, ние претпочитаме да работиме директно со Соединетите Американски Држави и со други земји – заклучи Гутереш.

Трамп тврди дека Советот за мир може да се покаже како „најзначајното меѓународно тело во историјата“.

Постојаното членство во Советот бара придонес од 1 милијарда долари, а многу земји низ целиот свет, како што се Обединетото Кралство, Канада, Франција и Германија, се воздржаа, додека Русија и Кина досега одбиваа да се приклучат.