Трет училишен инцидент во Полска за два дена: Поранешен ученик избодел три лица – едно лице убиено

Поранешен ученик (15) убил едно лице и повредил уште две во напад во училиште во Полска, соопшти полицијата. Нападот се случил само еден ден откако 19-годишник ранил 10 лица – вклучително и себеси – во друго училиште.

„И покрај обидите за реанимација, животот на 37-годишна вработена во училиштето не можеше да се спаси“, објави полицијата на платформата X.

Полицијата претходно соопшти дека 15-годишниот поранешен ученик бил уапсен откако влегол во училиштето во Лешчидол-Новини, во областа Вишкув североисточно од Варшава, околу 9 часот наутро. Според полицијата, тој повредил тројца вработени со остар предмет.

Меѓу повредените е и директорот на училиштето, кој успеал да го совлада 15-годишникот пред да пристигне полицијата.

Полициските службеници пристигнале на местото на настанот неколку минути по пријавата, додека инцидентот сè уште се одвивал.

Министерот за внатрешни работи Марчин Кјерињски исто така соопшти дека во Шерпц, во северно-централна Полска, бил приведен и 17-годишник осомничен за планирање на напад. Според министерот, во неговиот ранец биле пронајдени два ножа.

Ова се случува по нападот со нож во училиште во Остроленка, североисточна Полска, претходниот ден, во кој беа повредени 10 лица. Кратко по инцидентот, полицијата го приведе 19-годишниот осомничен, кој исто така бил меѓу повредените, пренесува „Индипендент“.