Ѓоковиќ не го менува својот план: „Би било убаво, но кога си во оваа фаза од кариерата…“

Српскиот тенисер Новак Ѓоковиќ уште еднаш потврди дека планира да настапи на следните Олимписки игри. Во второто коло на Индијан Велс, Новак Ѓоковиќ успешно го победи Полјакот Камил Мајшак со 4:6, 6:1, 6:2 по повеќе од два часа интензивен натпревар.

По натпреварот, американските новинари го прашаа дали планира да учествува на Олимписките игри, кои ќе се одржат во Лос Анџелес во 2028 година. Ѓоковиќ, кој веќе има златен медал од претходните Олимписки игри, отворено зборуваше за своите амбиции, но и за своите предизвици.

„Да, тоа би било убаво, ќе кажам дека тоа е една од моите долгорочни цели. Би било убаво да стигнам до Олимписките игри. Сè уште има долг пат. Кога си во оваа фаза од кариерата и си толку стар, секоја година изгледа подолга отколку за секој помлад. Но, ќе се обидам да стигнам таму, ќе се обидам да играм“, рече Ѓоковиќ.

Тениската јавност веќе со нетрпение го следи начинот на кој Ѓоковиќ ќе се балансира помеѓу натпреварувањето во АТП-календарот и подготовката за потенцијално учество на Олимписките игри, со оглед на тоа што тогаш ќе има речиси 41 година.

Во третото коло на Индијан Велс, тој ќе се соочи со Александар Ковачевиќ, талентиран Србин кој игра под знамето на САД.