Генералштабот на иранските вооружени сили ги негира извештаите за лансирање беспилотно летало кон Азербејџан

Генералштабот на иранските вооружени сили денес ги негираше извештаите за лансирање беспилотно летало кон Азербејџан, објави „Мехр“.

„Исламска Република Иран, почитувајќи го суверенитетот на сите земји, особено муслиманските и соседните земји, негира дека нејзините вооружени сили лансирале беспилотно летало кон Република Азербејџан“, соопшти Генералштабот.

Во соопштението се вели дека ваквите дејствија од страна на „лажниот ционистички режим“, кои имаат за цел да ги нарушат односите меѓу муслиманските земји на различни начини, се без преседан и дека „според истрагите, таква акција е преземена од страна на режимот за да ја обвини Исламската Република Иран“.

Најмалку четири лица се повредени кога, според Азербејџан, Техеран испалил два беспилотни летала на своја територија во близина на границата, објави АПА.

Повредените на меѓународниот аеродром Нахчиван се примени во одделот за итни случаи на локална болница, соопшти Министерството за здравство на Азербејџан.

Повредените добиваат потребна медицинска помош и се под медицински надзор, соопшти министерството.

Според лекарите, состојбата на повредените е стабилна и никој од нив не е во животна опасност.

Претходно денес, Азербејџан го обвини Иран дека испалил два дрона на негова територија и соопшти дека го повикал иранскиот амбасадор на разговори за да изрази силен протест.

Министерството за надворешни работи на Азербејџан соопшти дека еден дрон се урнал на аеродромот Нахчиван, во близина на границата со Иран, додека другиот се урнал во близина на училиште, објави Ројтерс.

Во соопштението се осудуваат нападите, се бара објаснување од Иран и се вели дека Азербејџан го задржува правото да преземе „соодветни мерки за одговор“.

Ракети и дронови лансирани од Иран паднаа на територијата на аеродромот во азербејџанската енклава Нахчиван утрово, предизвикувајќи пожар, изјави извор близок до азербејџанската влада за Ројтерс претходно денес.

Меѓународниот аеродром Нахчиван се наоѓа на околу 10 километри од границата со Иран.

Нахчиван е политички автономна, копнена енклава на Азербејџан, географски одвоена од остатокот од земјата и се граничи со Ерменија, Иран и Турција.