Украинските сили започнаа ракетен напад врз индустриски објект во рускиот регион Самара, изјави утрово регионалниот гувернер Вјачеслав Федоришчев. Според украинските медиуми, една од целите била руската вселенска агенција Роскосмос.
Според него, формиран е тим за итни интервенции, а сите надлежни служби се на терен, пренесува Интерфакс.
Информациите за последиците од нападот и жртвите сè уште се утврдуваат, изјави рускиот функционер.
Самарскиот регион се наоѓа во југоисточниот дел на европска Русија, кој е оддалечен околу 800 км од Украина.
Зеленски: Украина го погоди руското претпријатие Роскосмос со ракети Фламинго
Украинскиот претседател Володимир Зеленски денес изјави дека Украина започнала напади врз неколку цели во Русија, вклучувајќи го едно од клучните претпријатија на руската вселенска агенција Роскосмос, аеродромот Саваслејка и нафтениот објект во Уст-Луга.
Зеленски на Фејсбук изјави дека бил погоден центарот „Прогрес“ во регионот Самара, кој е дел од Роскосмос и, меѓу другото, произведува електронска опрема, објави Укринформ.
Според него, во нападот биле користени украински ракети „Фламинго“, а целта се наоѓа на околу 900 километри од украинската граница.
– Денес има нови значајни резултати од нашите длабински напади. Во регионот Самара во Русија, погодено е едно од клучните претпријатија во рамките на Роскосмос – центарот „Прогрес“, кој се занимавал конкретно со производство на електроника. Користени се ракети „Фламинго“, што е добро достигнување – рече Зеленски.
Според него, украинскиот напад го погодил и аеродромот Саваслејка во регионот Нижни Новгород, каде што се стационирани руските ракетни носачи. Аеродромот се наоѓа на околу 700 километри од Украина.
Зеленски додаде дека е регистрирана и штета на нафтен објект во Уст-Луга, регионот Ленинград, на повеќе од 800 километри од украинската граница.
– Нашиот план за долгорочни санкции против Русија за оваа војна се спроведува, а важно е да се намали воениот потенцијал на Русија – рече Зеленски, заблагодарувајќи им се на украинските единици кои учествуваа во нападите.
Украинскиот Генералштаб, според Укринформ, ја потврдил и штетата на производствениот комплекс на гасната компанија Новатек во регионот Ленинград.
Руско Министерство за одбрана: Соборени 598 украински беспилотни летала преку ноќ
Руското Министерство за одбрана денес објави дека воздушната одбрана пресретнала и уништила 598 украински беспилотни летала над руските региони и водите на Азовското и Црното Море преку ноќ, пренесува ТАС, наведувајќи дека ова бил еден од „најмасовните напади оваа година“.
Според соопштението на руското Министерство за одбрана, беспилотни летала биле соборени над регионите Белгород, Брјанск, Владимир, Воронеж, Калуга, Курск, Ленинград, Липецк, Нижни Новгород, Новгород, Орјол, Псков, Ростов, Рјазан, Смоленск, Твер и Тула, како и Московскиот регион, Краснодарската територија и над Азовското и Црното Море.
ТАС потсетува дека претходниот голем напад бил извршен на 2 август, кога, според руските податоци, биле соборени 635 беспилотни летала.
Најмасовниот напад оваа година, според руските податоци, се случил на 26 јуни, кога биле пресретнати и уништени 660 дронови.
Руските власти пријавиле 555 соборени дронови на 18 јуни и 556 на 17 мај.
ИЗДВОЕНИ
СИНОДОТ МУ ОДГОВОРИ НА СРПСКИОТ ПРЕТСЕДАТЕЛ, НО ШТО СО НЕПРИЈАТНИТЕ ПОРАКИ ОД БЕЛГРАД: Ќе се определат ли македонските владици дали МПЦ-ОА е своја на своето или е на имот што ѝ го дала СПЦ „на користење“?
Почина 72-годишник од западнонилска треска, на Инфективна
Гостиварци, конечно, добија безбедна вода за пиење – ќе ја пуштат ли чешмата без страв?
Со трактор пред огнот – Аце ја ораше земјата кога тргна пламенот кон селото
