Младинскиот културен центар, на 17 јуни (20 часот), во галеријата во рамките на објектот, ќе го реализира третото издание на изложбата „Професори и студенти“. Суштината на оваа групна изложба на дела на професори и студенти од уметничките факултети и школи во Македонија, е да даде слика на различните академски програми што тие ги нудат и да го покаже менторскиот однос помеѓу професорот и студентот. Оваа изложба дава придонес кон развојот на културната и ликовната свест во нашата држава и опфаќа разни дискурси што ја дефинираат современата уметност, каде што секој уметник или дизајнер придонесува со својата лична визија.
Факултетот за арт и дизајн при Европски универзитет и овој пат ќе се претстави со дела на професори и студенти, креирани во различни уметнички медиуми и дисциплини. Учествуваат: проф. д-р Гордана Вренцоска со Ана Камчева и Петар Новковски, проф. д-р Јана Манева-Чупоска со Елена Стојанова и Ана-Марија Матх, проф. м-р Благојче Наумоски со Меланија Стојанова и Исабелле Спасевска, проф. м-р Страхил Петровски со Петар Паунов и Стефанија Владева, aсс. м-р Славица Танеска со Евгенија Далческа и Меланија Јанковиќ, како и надв. соработници м-р Александар Рашковиќ со Марија Роглева и Ангела Трајковска и м-р Ана Трајковска со Анет Вртеска.
Инаку, учесници на изложбата се повеќе од 50 професори и студенти од осум важни високообразовни институции во Македонија.
„Учесниците се претставени со дела изработени во различни уметнички техники, вклучувајќи сликарство: масло и акрилик, цртеж, скулптура, дигитални медиуми, моден и внатрешен дизајн, фотографија и инсталација. Ова обединување на различните уметнички дисциплини ја рефлектира богатата и разновидна сцена на современата македонска уметност. Дополнително, тоа и е јасен показател за мултидисциплинарниот карактер на современото уметничко образување во Македонија, кое ги охрабрува студентите да се вклучат во уметничкиот дискурс со различните традиционални и современи уметнички форми и медиуми“, вели проф. Кирил Пенушлиски.
Изложбата ќе биде отворена до 30 јуни.
ИЗДВОЕНИ
Злоупотребата на болката не носи правда – Владата посветено продолжува да им помага на семејствата од кочанската трагедија
Македонија под вршник, нов екстремно топол бран следната седмица
Во Детската болница Козле нема вода, хоспитализираните деца ќе се префрлаат во други клиники
Цените растат, грамажите се намалуваат!
