Албанскиот премиер Еди Рама изјави дека е „сè уште прерано за ентузијазам“ во однос на најновите политички случувања во Србија и нивното потенцијално влијание врз европската интеграција на Западен Балкан.
Говорејќи во Даблин на настан организиран од Институтот за меѓународни и европски прашања (IIEA) на тема „Европскиот пат на Албанија: Од аспирација до интеграција“, Рама истакна дека Европската комисија „се соочила со проблеми со претходната српска администрација“, особено во однос на владеењето на правото и исполнувањето на основните критериуми за членство во ЕУ.
„Прерано е да се каже што било со сигурност за тоа што претстои“, рече Рама.
Албанскиот премиер ги опиша внатрешните политички промени во Србија како општествен и политички експеримент, осврнувајќи се на „Студентската листа“ и методот користен за избор на кандидати кои би можеле да влезат во парламентот или владата. Според него, ова претставува нов пристап во многу погледи, но останува да се види какви резултати ќе донесе, пренесува „Телеграф“.
Рама посебно се осврна на односите меѓу Косово и Србија, нагласувајќи дека „без отворен став на Белград кон Приштина и процесот на нормализација, тешко е да се очекува одржлив напредок во регионот“.
„Сè додека нема отворен пристап кон Косово и нормализација со него, духот на минатото ќе продолжи да го прогонува Белград, спречувајќи го српскиот народ да помине низ прекупотребната катарза – нешто што сè уште недостасува“, изјави Рама. Изјавите на албанскиот премиер доаѓаат во време кога политичките случувања во Србија остануваат еден од клучните фактори за стабилноста и европската перспектива на Западен Балкан.
