Еден од основачите на нарко-картелот Синалоа е осуден на доживотен затвор – се изјасни за виновен за обвинувањата

Еден од основачите на мексиканскиот нарко-картел Синалоа, Исмаел „Ел Мајо“ Замбада, беше осуден на доживотен затвор во Бруклин.

Замбада се изјасни за виновен за трговија со дрога и водење криминална организација, а исто така изјави пред судот дека „се кае за своите постапки“ и повика на прекин на насилството поврзано со организираниот криминал.

„Никој не победува во ваква војна. Жал ми е за штетата што ја предизвикав и за примерот што го поставив. Насилството мора да престане“, рече Замбада.

Обвинителите оценија дека неговите изјави се спротивни на неговите децениски активности за време на кои тој нарачувал убиства и тортура, додека картелот Синалоа шверцувал големи количини кокаин, фентанил, метамфетамин и други дроги во Соединетите Држави.

Судијата Брајан Коган рече дека не може да изрече полесна казна бидејќи законот бара задолжителна доживотна казна затвор за кривичните дела за кои Замбада се изјасни за виновен.

Покрај затворската казна, судот изрече и финансиска казна од 15 милијарди долари, што се однесува на приходите од криминални активности, иако обвинителството вели дека не е пронајден имот што би можел да се заплени.

На барање на одбраната, судијата препорача Замбада да ја отслужи казната во затворска медицинска установа поради повеќекратни сериозни здравствени проблеми и влошување на когнитивните способности.

Замбада беше уапсен во јули 2024 година откако беше префрлен во Тексас, а тврди дека претходно бил киднапиран во Мексико.

Тој се изјасни за виновен во август 2025 година, со што избегна долго судење, пренесе „Бета“.