Дронови го погодија клучниот нафтовод во Саудиска Арабија: Се сомнева на напад од Ирак, цената на нафтата надмина 100 долари

Повеќе извори од американската администрација за Си-Ен-Ен потврдија дека клучен систем на нафтоводи во Саудиска Арабија бил погоден од ракети. Нападот – за кој постои сомневање дека е извршен со беспилотни летала лансирани од ирачка територија – дополнително ги ескалираше тензиите на Блискиот Исток и ги подигна цените на суровата нафта над 100 долари за барел.

Прелиминарните анализи укажуваат на тоа дека нападот бил насочен кон пумпните станици лоцирани долж нафтоводот. Сателитските снимки покажуваат големи оштетувања и густ црн чад на локациите на инфраструктурата, додека официјалните лица сè уште го проценуваат обемот на штетата и времето потребно за поправки.

Прашањето за пренасочување на трасата
Овој напад доаѓа во исклучително чувствителен момент за глобалниот пазар на енергенси. Откако преминот низ Ормускиот теснец беше практично блокиран поради конфликтот меѓу САД и Иран, Саудиска Арабија пренасочи околу пет милиони барели нафта дневно преку својот нафтовод „Исток-Запад“ кон пристаништето Јанбу на Црвеното Море, пренесува Си-Ен-Ен.

Сепак, со новите оштетувања на пумпните станици и заканите од Хутите во теснецот Баб ел-Мандеб, оваа алтернативна извозна рута за Кралството сега исто така е изложена на директен ризик.

Прокси групите како алатки за ескалација
Аналитичарите забележуваат дека нападот се вклопува во пошироката иранска стратегија за користење на сојузничките милиции во Ирак и Јемен со цел да се изврши притисок врз арапските земји и американските сили во регионот.

Извори изјавија за Си-Ен-Ен дека саудиските претставници ја предупредиле Белата куќа за време на неодамнешните состаноци во Вашингтон дека тековниот конфликт ќе предизвика бран на ескалација токму преку овие групи-застапници. Саудиските власти, државниот нафтен гигант „Арамко“, како и Стејт департментот на САД и Белата куќа, сè уште немаат дадено официјален коментар за извештаите за нападот. Инцидентот се случи во момент кога производството на сурова нафта во Саудиска Арабија веќе беше паднато на најниското ниво од 1990 година.